[1] Singet en nei leet zumm Hah, fa eah hott vundahboahri sacha gedu; Sei rechtsi hand un heilichah oahm henn di ivvah-hand grikt fa een.
[2] Da Hah hott sei saylichkeit vissa glost; eah hott sei gerechtichkeit gvissa zu di heida.
[3] Eah hott an sei bamhatzichi leevi un sei shtandhaftichkeit zumm haus funn Israel gedenkt. Awl di leit biss an's end funn di veld henn di saylichkeit funn unsah Gott ksenna.
[4] Greishet zumm Hah mitt frayt ivvahrawlich in di eaht, singet laut mitt lohb un preiset een.
[5] Singet lohb zumm Hah mitt di harfa, mitt di harfa, un singet mitt eiyah shtimma.
[6] Blohset di trumpets un di hanna, singet mitt frayt fannich em Hah, da Kaynich.
[7] Loss da say roahra un alles es drinn laybt, un aw di veld, un alli-ebbah es drinn voond.
[8] Loss di revvahra iahra hend zammah shlauwa, un loss di hivla zammah singa mitt frayt,
[9] loss si singa fannich em Hah, fa eah kumd fa di eaht richta. Eah richt di veld in gerechtichkeit, un di leit so vi's recht is.