<Di Psaltah 124

[1] Vann da Hah nett uf unsah seit gvest veah— loss Israel nau sawwa—

[2] “Vann da Hah nett uf unsah seit gvest veah, vo mensha sich ufkshteld henn geyyich uns,

[3] dann hedda si uns levendich uf kshlukt, vo iahra zann gebrend hott geyyich uns;

[4] no hett's vassah uns vekk gedrawwa, un di vella veahra ovva ivvah uns gvest,

[5] di rawsicha vassahra veahra ivvah unsah sayl kumma.”

[6] Lohb sei zumm Hah, es eah uns nett glost hott farissa sei bei iahra zay.

[7] Unsah sayl is difunn kflowwa vi en fokkel aus di shtrikka-shling fumm hundah; di shling is farissa un miah sinn difunn kflowwa.

[8] Unsah hilf is im nohma fumm Hah, deah es da himmel un di eaht gmacht hott.