[1] Shlauwet eiyah hend zammah, awl diah leit, greishet zu Gott mitt di shtimm funn frayt.
[2] Fa da Alli-Haychsht Hah is shreklich, un en Grohsah Kaynich ivvah di gans eaht.
[3] Eah hott di heida unnich uns gedu, un di leit unnich unsah fees.
[4] Eah hott unsah eahbshaft raus glaysa fa uns, di hallichkeit fumm Jakob, deah vo eah leeb hott. (Sela)
[5] Gott is nuff ganga diveil di leit am greisha voahra mitt frayt. Diveil es di blohs-hanna geblohsa henn, is da Hah nuff ganga.
[6] Singet lohb zu Gott, singet lohb. Singet lohb zu unsah Kaynich, singet lohb.
[7] Fa Gott is da Kaynich funn di gans eaht; singet lohb zu eem mitt en psalm.
[8] Gott roold ivvah di heida, Gott hokt uf sei heilichah kaynich-shtool.
[9] Di roolahs funn di heida henn sich fasammeld, es vi di leit fumm Abraham sei Gott. Fa di kaynicha funn di eaht heahra zu Gott, eah is hohch uf kohva.