[1] Oh Hah Gott, mei Heiland, ich roof zu diah fa hilf dawk un nacht.
[2] Loss mei gebayt fannich dich kumma, dray dei oah zu miah vann ich roof.
[3] Mei sayl is foll druvvel, un mei layva is nayksht am doht.
[4] Ich binn fanumma es vi selli es nunnah in's grawb gayn; ich binn vi en mann es kenn grefta hott.
[5] Ich binn falossa unnich di dohda, vi selli es umgebrocht sinn un im grawb leiya, selli es du fagessa hosht, un abkshnidda sinn funn dei hilf.
[6] Du hosht mich in's deef grawb gedu, in en dunkel un en deef loch.
[7] Dei zann leit shveah uf miah, du driksht mich nunnah mitt dei vella. (Sela)
[8] Du hosht awl mei freind gmacht mich falossa; du hosht mich grausam gmacht zu eena; ich binn kfanga un kann nett vekk.
[9] Mei awk vatt dunkel deich dreebsawl; ich roof zu diah alli dawk, oh Hah; ich hayb mei hend naus zu diah.
[10] Zaylsht du vundahra du fa di dohda? Zayla di dohda uf shtay un dich danka? (Sela)
[11] Is dei shtandhaftichi-leevi vissa gmacht im grawb, adda dei shtandhaftichkeit im land funn fadeahves?
[12] Sinn dei vundahra vissa gmacht im dunkla, adda dei gerechtichkeit im land funn di fagessana?
[13] Avvah ich roof naus zu diah fa hilf, oh Hah, un mei gebayt kumd free meiyets zu diah.
[14] Favass draysht du mich nunnah, oh Hah? Favass fashtekkelsht du dei ksicht funn miah?
[15] Funn yungem uf habb ich dreebsawl glidda un voah nayksht am doht; ich habb dei shtrohf glidda un ich kann miah nimmi helfa.
[16] Dei gleedichah zann is ivvah mich kumma; da shreklich angsht funn diah drikt mich nunnah.
[17] Si sinn um mich rumm vi vassah da gans dawk, si kumma rei ivvah mich funn alli seit.
[18] Awl mei freind un naykshti hosht du gmacht mich falossa, un's is dunkel vo-evvah es ich binn.