[1] Sei nett zannich veyyich dee vo evil doon, un sei nett fagunnish ivvah selli es letz doon.
[2] Fa si doon glei uf-drikla vi graws, vi en greenah shtokk doon si kshvind favelka.
[3] Du dei fadrauwa in da Hah un du goot, no kansht im land voona un brauchsht dich nett feicha.
[4] Du dei falanga in da Hah, no gebt eah diah vass dei hatz havva vill.
[5] Gebb dei vayk ivvah zumm Hah, drau eem, un eah zayld's du.
[6] Eah macht dei gerechtichkeit sheina vi en licht, un dei gericht vi di middawk sunn.
[7] Sei shtill fannich em Hah, un voaht geduldich uf een. Sei nett bekimmaht vann's goot gayt mitt leit, adda mitt selli es iahra evili sacha ausdrawwa.
[8] Sei nett bays; dray vekk funn deim zann, sei nett bekimmaht, veil's dich yusht zumm evila fiaht.
[9] Fa di gottlohsa vadda abkshnidda, avvah selli es voahra uf da Hah, zayla's land eahva.
[10] Noch en glenni zeit, un di gottlohsa sinn nimmi do, even vann du guksht fa si, kenna si nimmi kfunna sei.
[11] Di daymeedicha zayla's land eahva, un zayla sich froiya mitt en grohsah fridda.
[12] Di gottlohsa shaffa geyyich di gerechta, un beisa iahra zay zammah geyyich si.
[13] Avvah da Hah lacht ivvah di gottlohsa, veil eah saynd es iahra dawk am kumma is.
[14] Di gottlohsa zeeya's shvatt raus, un zeeya da bow zrikk, fa di oahma un aylendichi nunnah bringa, un selli shlachta es ufrichtich lawfa.
[15] Avvah iahra shvadda shtecha deich iahra aykni hatza, un iahra bows zayla fabrocha gay.
[16] Es bissel es di gerechti henn, is bessah es es feel es di gottlohsa henn.
[17] Di eahm funn di gottlohsa vadda fabrocha, avvah da Hah haybt di gerechta uf.
[18] Da Hah vayst veyyich di dawwa funn di unshuldicha, un iahra eahbshaft bleibt fa'immah.
[19] In shlechti zeida braucha si sich nett shemma, an di dawwa funn hungahs-noht henn si blendi.
[20] Avvah di gottlohsa zayla umkumma: Di feinda fumm Hah zayla sei vi shayni vayt-feldah, si zayla fagay—vi shmohk zayla si fagay.
[21] Da gottlohs laynd un betzawld nett zrikk, avvah da gerecht is goot-maynich un gebt geahn.
[22] Selli es ksaykend sinn bei eem, eahva's land, avvah selli es faflucht sinn bei Gott, vadda abkshnidda.
[23] En goodah mann sei shritt sinn grawt kalda beim Hah, un sei vayk is eem kfellich.
[24] Vann eah shtolbaht, dutt eah nett falla, fa da Hah haybt sei hand.
[25] Ich voah moll yung, un nau binn ich ald, avvah ich habb di gerechta nee nett ksenna falossa sei, adda iahra kinnah am broht bedla.
[26] Si sinn immah goot-maynich un layna geahn, un iahra kinnah sinn ksaykend.
[27] Dray fumm evila un du goot, no zaylsht du immah im land voona.
[28] Da Hah leebt sell vass recht is, un falost nett sei shtandhaftichi. Si vadda aus di kfoah kalda fa'immah, avvah di nohch-kummashaft funn di gottlohsa vadda abkshnidda.
[29] Di gerechta zayla's land eahva, un drinn voona fa'immah.
[30] 'S maul fumm gerechta mann shvetzt veisheit, un sei zung sawkt vass recht is;
[31] es ksetz funn sei Gott is in seim hatz, un sei fees doon nett shlibba.
[32] Da gottlohs mann voaht un vatsht fa da gerecht mann, un broviaht een umbringa.
[33] Avvah da Hah lost een nett im gottlohsa sei hand sei, un lost een nett shuldich sei vann eah gricht is.
[34] Voaht uf da Hah, un hald dich uf seim vayk. No haybt eah dich uf fa's land eahva. Vann di gottlohsa abkshnidda vadda, zaylsht du's sayna.
[35] Ich habb en gottlohsah mann ksenna es leit nunnah drett, un es sich grohs un brayt gmacht hott vi en greenah bohm,
[36] ich binn viddah fabei kumma, un eah voah nimmi gvest; ich habb nohch kfrohkt, avvah eah hott nimmi kfunna sei kenna.
[37] Nemm acht fumm unshuldicha mann, un vatsh sellah es eahlich is. Fa da mann mitt fridda zayld nohch-kummashaft havva.
[38] Avvah di ivvah-dreddah zayla awl umkumma, un di gottlohsa iahra nohch-kummashaft vatt abkshnidda.
[39] Di saylichkeit funn di gerechta kumd fumm Hah, eah is iahra grefta an di zeit funn druvvel.
[40] Da Hah helft eena un macht si frei; eah hald si aus di kfoah funn di gottlohsa, veil si sich falossa uf een.