[1] Nett zu uns, oh Hah, nett zu uns, avvah zu dei nohma gebb eah, fa dei shtandhaftichi-leevi un voahheit.
[2] Favass doon di heida frohwa, “Vo is iahra Gott?”
[3] Unsah Gott is im himmel, eah dutt ennich ebbes es eah vill.
[4] Avvah iahra abgettah sinn silvah un gold; si sinn gmacht mitt di hend funn mensha.
[5] Si henn meilah, avvah si kenna nett shvetza; si henn awwa, avvah si kenna nett sayna.
[6] Si henn oahra, avvah si kenna nett heahra; si henn nays, avvah si kenna nett shmakka.
[7] Si henn hend, avvah si kenna nett feela; si henn fees, avvah si kenna nett lawfa, un si kenna kenn yacht macha mitt iahra hals.
[8] Selli es dee abgettah macha, zayla vadda vi si, un aw awl selli es sich falossa uf si.
[9] Oh Israel, falosset eich uf da Hah; eah is eiyah hilf un shield.
[10] Oh haus fumm Aaron, falosset eich uf da Hah; eah is eiyah hilf un shield.
[11] Diah es da Hah firchtet, falosset eich uf da Hah; eah is eiyah hilf un shield.
[12] Da Hah denkt an uns un saykend uns; eah saykend's haus funn Israel; eah saykend's haus fumm Aaron.
[13] Eah saykend selli es da Hah firchta, di grohsa un di glenna.
[14] Loss da Hah eich may un may sayya gevva, eich un aw eiyah kinnah.
[15] Diah sind ksaykend bei em Hah, deah es da himmel un di eaht gmacht hott.
[16] Da haychsht himmel heaht zumm Hah, avvah eah hott di eaht zu di mensha-kinnah gevva.
[17] Di dohda doon da Hah nett lohva, selli es nunnah gayn vo's shtill is.
[18] Avvah miah zayla da Hah lohva, funn nau biss in di ayvichkeit. Halleluja!