[1] Di sind shvetzt zu di ungettlicha deef in iahra hatza, es is kenn furcht funn Gott fannich iahra awwa.
[2] Veil si zu feel denka funn sich selvaht, doon si iahra sinda nett sayna un hassa.
[3] Di vadda funn iahra maul sinn gottlohs un falsh, si henn kenn veisheit may fa goot du.
[4] Si henn gottlohsi sacha im sinn diveil es si im bett sinn; si gayn naus uf en vayk es nett goot is, un si drayya evil nett nunnah.
[5] Dei shtandhaftichi-leevi, oh Hah, langd nuff in da himmel, un dei voahheit biss nuff an di volka.
[6] Dei gerechtichkeit is vi di berga funn Gott, un dei gericht vi da deef say. Oh Hah, du gebsht acht uf di mensha un's fee.
[7] Vi keshtlich is dei shtandhaftichi-leevi, oh Gott! Di kinnah funn mensha nemma sich aus di kfoah, im shadda funn dei flikkel.
[8] Si essa sich foll mitt di feel goodi sacha funn dei haus; du gebsht eena zu drinka aus da revvah funn dei blesiah.
[9] Fa bei diah is di shpring funn layva; in deim licht sayna miah helling.
[10] Hald oh mitt dei shtandhaftichi-leevi zu selli es dich kenna, un mitt dei gerechtichkeit zu selli es ufrichtich sinn im hatz.
[11] Loss nett da foos funn di shtolsa uf mich dredda, adda di hand funn di gottlohsa mich vekk dreiva.
[12] Datt leiya di evil-shaffah uf em bodda, si voahra nunnah kshmissa un kenna nimmi uf shtay.