[1] Oh Hah, ich du mei fadrauwa in dich; loss mich nee nett fashohmd sei.
[2] Mach mich frei deich dei gerechtichkeit un helf miah raus; dray dei oah zu miah un mach mich saylich.
[3] Sei mei sayf shtay-heisli, vo ich immah nei gay kann. Du hosht gebodda gevva fa miah helfa, fa du bisht mei Felsa un mei feshtah Roo-Blatz.
[4] Mach mich frei, oh mei Gott, aus di hand funn di ungettlicha, aus di hand funn evili un gottlohsi mennah.
[5] Fa du bisht mei hofning, oh Hah, mei Gott, mei fadrauwung funn yungem uf.
[6] Ich habb mich falossa uf dich evvah siddah es ich geboahra voah; du hosht mich aus mei muddahs-leib gnumma, un ich du dich preisa fa'immah.
[7] Ich binn vi en vunnah zu feel leit, avvah du bisht mei shteikah Roo-Blatz.
[8] Mei maul is foll mitt dei lohb, un mitt dei hallichkeit da gans dawk lang.
[9] Shmeis mich nett vekk vann ich ald binn; du mich nett falossa vann ich kenn grefta may habb.
[10] Fa mei feinda shvetza geyyich mich, selli es voahra fa mich doht macha shaffa zammah.
[11] Si sawwa, “Gott hott een falossa; gaynd eem nohch un fanget een, fa's is nimmand es eem helfa kann.”
[12] Oh Gott, bleib nett veit vekk funn miah; dummel dich, oh mei Gott, un helf miah.
[13] Loss selli es mei sayl pshuldicha sich shemma un umkumma. Loss selli es miah letz du vella zu gedekt sei mitt shpott un shohm.
[14] Avvah ich selvaht zayl immah hofning havva, un zayl dich may un may preisa.
[15] Mei maul zayld shvetza veyyich dei gerechtichkeit, un veyyich dei saylichkeit da gans dawk lang, even vann's may is es ich fashtay kann.
[16] Ich kumm un preis di mechticha kshefta funn Gott da Hah; ich shvetz veyyich dei gerechtichkeit, un yusht deini laynich.
[17] Funn yungem uf, oh Gott, hosht du mich gland, un ich bekenn dei vundahboahri kshefta alsnoch.
[18] Un nau even vann ich ald un groh binn, du mich nett falossa, oh Gott, biss ich dei macht fakindicht habb zu di kinds-kinnah, un dei graft zu selli es nohch kumma.
[19] Dei gerechtichkeit, oh Gott, langd nuff in da himmel, du es grohsi sacha gedu hosht, oh Gott. Veah is vi du?
[20] Du hosht mich glost feel druvvel un angsht sayna, avvah du machsht mich viddah levendich, un bringsht mich viddah ruff aus em deefa funn di eaht.
[21] Du machsht mich hohch geaht sei, un gebsht miah viddah drohsht.
[22] Ich vill dich aw preisa mitt harfa, fa dei shtandhaftichkeit, oh mei Gott. Ich vill lohb singa zu diah mitt di harf, du Heilichah funn Israel.
[23] Mei leftz greisha naus mitt frayt, vann ich lohb sing zu diah; un mei sayl es du gerecht gmacht hosht dutt aw.
[24] Un mei zung zayld shvetza veyyich dei gerechtichkeit da gans dawk lang, veil selli es miah letz du henn vella, fashtatzt un fashohmd sinn.