[1] Ich roof zu Gott mitt mei shtimm fa hilf, zu Gott roof ich, un eah heaht mich.
[2] Im dawk funn mei druvvel such ich da Hah; in di nacht is mei hand naus kshtrekt un vatt nett meet; mei sayl lost sich nett drayshta.
[3] Ich denk an Gott, un binn bedreebt, ich denk's ivvah, un mei hatz vatt engshtlich. (Sela)
[4] Du haldsht mich vakkah un haldsht mei awwa uf; ich binn so gedruvveld es ich nett shvetza kann.
[5] Ich denk an di alda dawwa, an di yoahra lang zrikk.
[6] Ich meind noch vi ich als ksunga habb nachts, ich denk an dess im hatz, un mei geisht frohkt,
[7] “Zayld da Hah uns zrikk shtohsa fa'immah? Zayld eah sei gnawt nee nimmi veisa?
[8] Hott sei shtandhaftichi-leevi kshtobt fa'immah? Hott sell vass eah fashprocha hott zu uns kshtobt fa'immah?
[9] Hott Gott fagessa fa bamhatzich sei? Hott sei zann da blatz gnumma funn sei bamhatzichkeit?” (Sela)
[10] Un ich sawk, “Dess is vass miah vay dutt— es di rechts hand fumm Alli-Haychshta nimmi greftich is.”
[11] Avvah ich zayl an di kshefta fumm Hah denka, yau, ich denk an dei vundahra funn lang zrikk.
[12] Ich zayl ivvah awl dei verka denka, un zayl zrikk denka an awl dei kshefta.
[13] Dei vayya, oh Gott, sinn heilich. Vo is en gott es so mechtich is vi unsah Gott?
[14] Du bisht da Gott es vundahra dutt; du veisht dei graft unnich di leit.
[15] Du hosht dei leit frei-kshteld mitt deim mechticha oahm, di kinnah fumm Jakob un em Joseph. (Sela)
[16] Vo di vassahra dich ksenna henn, oh Gott, vo di vassahra dich ksenna henn, henn si sich kfeicht, yau, di deefa vassahra henn kshiddeld.
[17] Di volka henn vassah runnah greyyaht, di himla henn gedimmeld, un di gviddah-shtrawla sinn zrikk un faddi ganga.
[18] Di yacht funn dimmel voah im himmel, gviddah-shtrawla henn di veld hell gmacht, un di eaht hott geziddaht un kshiddeld.
[19] Dei vayk is deich da say ganga, un dei pawt deich di grohsa vassahra, doch dei kshpuah voah nett ksenna.
[20] Du hosht dei leit kfiaht vi en drubb shohf, mitt di hand fumm Mosi un em Aaron.