<Di Psaltah 93

[1] Da Hah is kaynich, un is geglayt in hallichkeit; da Hah is geglayt in hallichkeit un ohgedu mitt graft. Eah hott di veld fesht gegrund un see kann nett gmooft sei.

[2] Fumm ohfang voah dei kaynich-shtool ksetzt; du bisht ayvichlich.

[3] Di hohcha vassahra hayva sich uf, oh Hah, di hohcha vassahra henn iahra shtimm ufkohva; di hohcha vassahra hayva iahra vella uf.

[4] Graysah es di yacht funn grohsi vassahra; graysah es di hohcha vella fumm say, is da Hah, hohch un mechtich.

[5] Dei Vatt shtayt fesht ayvichlich; hallichkeit is ivvah dei haus, oh Hah, fa'immah.