<Di Psaltah 122

[1] Ich voah froh vo si ksawt henn zu miah, “Vella nuff an's haus fumm Hah gay.”

[2] Nau sinn unsah fees am shtay inseit dei doahra, oh Jerusalem.

[3] Jerusalem is gebaut es en shtatt vo leit zammah kumma sella.

[4] Datt is vo di shtamma nuff anna gayn, di shtamma fumm Hah, vi's gebodda is fa Israel, es si dank gevva sella im Hah sei nohma.

[5] Fa datt shtayn di richtah-shteel, di shteel fumm haus fumm Dawfit.

[6] Baydet fa fridda in Jerusalem: “Loss es goot gay mitt selli es dich leeb henn.

[7] Loss fridda sei inseit dei vanda, un kenn kfoah sei inseit dei kaynich-heisah.”

[8] Fa di sayk funn mei breedah un freind, vill ich diah fridda vinsha.

[9] Fa di sayk fumm Hah unsah Gott sei haus, vill ich's beshta sucha fa dich.