[1] Oh Hah, zank mich nett in deim zann, un shtrohf mich nett diveil es du bays bisht.
[2] Dei arrows shtekka deef in miah, un dei hand drikt mich nunnah.
[3] Es is nix ksundes in meim leib deich dei zann, un's is kenn fridda in mei gnocha deich mei sinda.
[4] Fa mei sinda gayn ivvah mei kobb; vi en shveahrah lasht, sinn si zu shveah fa mich.
[5] Mei vayyi blakka sinn am fafaula un shtinka, veil ich mich so dumm ohkshikt habb.
[6] Ich binn grumm un ivvah-gebikt, un gay rumm in dreebsawl da gans dawk.
[7] Mei leib is am brenna mitt shmatza, es is nix ksundes in meim flaysh.
[8] Ich binn matt un alles fadrikt; ich yammah veil mei hatz unruich is.
[9] Oh Hah, awl mei falanga sinn gvissa zu diah, un mei hatt shnaufes is nett fashtekkeld funn diah.
[10] Mei hatz globt hatt, un mei grefta falossa mich; un even's licht funn mei awwa is ausganga.
[11] Mei kumrawda un mei freind halda sich vekk funn miah deich mei granket, un mei freindshaft hald sich veit vekk.
[12] Selli es mich doht macha vella, shtella falla fa mich; selli es miah vay du vella shvetza veyyich miah shawda du, un si macha aus da gans dawk vi si mich ohfiahra vella.
[13] Ich binn vi en dawbah mann es nett heahra kann, un vi aynah es nett shvetza kann.
[14] Yau, ich binn vi en mann es nett heaht, aynah es nett zrikk shvetza kann mitt seim maul.
[15] Ich voaht uf dich, oh Hah; du gebsht andvat, oh Hah mei Gott.
[16] Fa ich habb ksawt, “Loss si nett sich froiya ivvah mich; loss si nett sich hohch uf hayva ivvah mich vann mei foos shlibt.”
[17] Fa ich binn shiah goah am falla, un mei shmatza sinn immah bei miah.
[18] Ich bekenn mei shulda, un binn engshtlich veyyich mei sinda.
[19] Mei feinda sinn foll layva un sinn shteik, selli es mich hassa unni uahsach sinn feel.
[20] Selli is mei goodes zrikk betzawla mitt evil, sinn geyyich mich veil ich goodes nohch gay.
[21] Faloss mich nett, oh Hah, bleib nett veit vekk funn miah, oh mei Gott.
[22] Dummel dich un helf miah, oh Hah, mei Saylichkeit.