[1] Oh Hah, du voahsht unsah voon-blatz fa'immah un immah.
[2] Eb di hivla gmacht voahra, un eb du di eaht un di veld kshaffa hosht, dann voahsht du Gott funn ayvichkeit zu ayvichkeit.
[3] Du draysht da mensh zrikk zu shtawb, un sawksht, “Drayyet viddah zrikk, oh kinnah funn mensha.”
[4] En dausend yoah zu diah sinn vi geshtah es yusht fabei ganga is, adda vi ay vatsh zeit deich di nacht.
[5] Du nemsht mensha vekk im shlohf fumm doht, si sinn vi nei graws es meiyets shpraut,
[6] meiyets dutt's shprauda un dutt bleeya, avvah ohvets dutt's favelka un fadadda.
[7] Dei zann macht uns fagay, un veil du bays bisht, sinn miah fagelshtaht.
[8] Du hosht unsah sinda fannich dich ksetzt, un unsah fashtekkeldi sinda raus fannich dei ksicht gedu.
[9] Unsah gans layva kumd zu en end deich dei zann, un unsah yoahra enda vi en ohften.
[10] Di leng funn unsah dawwa sinn sivvatzich yoah, adda achtzich, vann miah shteik sinn; avvah di besht funna bringa yusht eahvet un druvvel, si sinn glei ivvah un miah sinn nimmi do.
[11] Veah fashtayt dei graft vann du bays bisht? Veah vayst di furcht funn deim zann?
[12] So lann uns fa unsah dawwa zayla, so es unsah hatza veisheit greeya.
[13] Kumm zrikk, oh Hah, vi lang zayld's sei? Davvah dei gnechta!
[14] Fill uns meiyets mitt dei shtandhaftichi-leevi, so es miah fraylich un froh sinn unsah layva lang.
[15] Mach uns froh grawt so feel dawk es du uns dreebsawl gevva hosht, un so feel yoahra es miah druvvel katt henn.
[16] Loss dei verka gvissa sei zu dei gnechta, un dei hallichi graft zu iahra kinnah.
[17] Loss di gnawt fumm Hah unsah Gott uf uns sei, sayken di eahvet es miah doon mitt unsah hend, yau, sayken di eahvet funn unsah hend.