<Di Psaltah 61

[1] Heich mich ab vann ich roof, oh Gott; nemm acht funn meim gebayt.

[2] Fumm end funn di eaht roof ich zu dich, vann ich shvach binn im hatz. Fiah mich zu sellah Felsa es haychah is es ich binn.

[3] Du bisht mei sayfah Roo-Blatz, mei shteiki Vand geyyich di feinda.

[4] Ich vill in deim tent voonah fa'immah, un mich fashtekla unnich dei flikkel. (Sela)

[5] Du hosht mei fashprechinga keaht, oh Gott, un hosht miah di eahbshaft gevva es zu selli heaht es dei nohma firchta.

[6] Mach em kaynich sei layva lang, loss een on un on layva,

[7] so es eah immah roold fannich Gott; vatsh ivvah een mitt dei grohsi leevi un voahheit.

[8] No sing ich preis zu deim nohma fa'immah, so es ich dawk noch dawk du vass ich fashprocha habb.