[1] Mei sayl is shtill un voaht yusht laynich uf Gott; funn eem kumd mei saylichkeit.
[2] Eah laynich is mei Felsa, mei Saylichkeit, un mei feshtah Roo-Blatz. Ich zayl nee nett shtolbahra adda falla.
[3] Vi lang gaynd diah uf en mann lohs, deah es diah awl doht macha vellet— deah es is vi en shrayksi vand un en fabrochani fens?
[4] Si denka yusht vi si een runnah bringa kenna funn sei hohchah blatz. Si henn frayt in leeya. Mitt iahra meilah saykna si, avvah mitt iahra hatza faflucha si. (Sela)
[5] Mei sayl, sei shtill un voaht yusht uf Gott, mei hofning is yusht in eem laynich.
[6] Eah laynich is mei Felsa, mei Saylichkeit un mei feshtah Roo-Blatz. Ich zayl nee nett shtolbahra adda falla.
[7] In Gott is mei saylichkeit un mei eah, eah is mei grohsah Felsa un mei shteikah Roo-Blatz.
[8] Drauwet in een alli zeit, oh leit; leahret eiyah hatza aus zu eem; Gott is unsah sayfah Roo-Blatz. (Sela)
[9] Niddah gachti mensha sinn yusht vi en ohften, hohch-gachti mensha sinn vi en leek; uf di vohk veeya si nix, alles zammah sinn si leichtah es en ohften.
[10] Falosset eich nett uf rawves, un doond eiyah fadrauwa nett in kshtohla shtoft. Vann diah reich vaddet, setzet eiyah hatza nett uf sell.
[11] Ay moll hott Gott kshvetzt, un zvay moll havvich dess keaht: Gott laynich is mechtich.
[12] Un zu diah, oh Hah, heaht grohsi leevi, fa du bezawlsht yaydah ebbah fa vass eah fadeend hott.