<Di Psaltah 130

[1] Aus em deefa roof ich zu diah, oh Hah.

[2] Oh Hah, heah mei shtimm! Loss dei oahra abheicha zu mei roof fa hilf.

[3] Vann du sinda uf shreiva daytsht, oh Hah, veah kend shtay?

[4] Avvah du fagebsht uns, so es miah dich firchta doon.

[5] Ich voaht uf da Hah, mei sayl voaht, un ich du mei hofning in sei vatt.

[6] Mei sayl voaht uf da Hah, may es di vatsh-mennah voahra fa da meiya, may es di vatsh-mennah voahra fa da meiya.

[7] Oh Israel, du dei hofning in da Hah, fa mitt em Hah is shtandhaftichi-leevi, un mitt eem is di foll saylichkeit.

[8] Eah macht Israel saylich, funn awl iahra sinda.