[1] Oh Gott, di heida sinn rei kumma fa dei eahbshaft ivvah-nemma; si henn dei heilichah tempel unrein gmacht, un henn Jerusalem en shtay haufa gmacht.
[2] Si henn di dohda leivah funn dei gnechta zu di fekkel fumm himmel gevva fa ess-sach, un's flaysh funn dei heilichi zu di diahra fumm land gevva.
[3] Si henn iahra bloot ausgleaht vi vassah um Jerusalem rumm, un's voah nimmand datt fa si fagrawva.
[4] Miah sinn en shpott gmacht zu unsah nochbahra; selli um uns rumm shpodda un lacha ivvah uns.
[5] Vi lang, oh Hah? Zaylsht du bays sei fa'immah? Zayld dei zann ohhalda brenna vi feiyah?
[6] Dray dei zann uf di heida, uf selli es dich nett kenna, selli kaynich-reicha es dei nohma nett ohroofa.
[7] Si henn em Jakob sei nohch-kummashaft ufkfressa, un sei haym-land fasaut.
[8] Hayb di sinda funn unsah foah-feddah nett geyyich uns; loss dei bamhatzichkeit kshvind uf uns kumma, fa miah henn en grohsi noht.
[9] Helf uns, oh du Gott funn unsah saylichkeit, fa di hallichkeit funn deim nohma. Mach uns frei, un fagebb unsah sinda, fa da sayk funn deim nohma.
[10] Favass sedda di heida sawwa, “Vo is iahra Gott?” Fannich unsah awwa, loss es gvissa vadda unnich di heida, es du zrikk betzawlsht fa's fagossa bloot funn dei gnechta.
[11] Loss es geyammah funn di kfangana fannich dich kumma, un bei dei grohsi macht hald selli levendich es kshteld sinn fa doht gmacht vadda.
[12] Betzawl zrikk in di shohsa funn unsah nochbahra sivva mohl so feel shohm es si dich fashohmd henn mitt, oh Hah.
[13] No doon miah, dei leit un di shohf funn dei vayt, dich ayvichlich danka, un miah preisa dich fa'immah un immah.