[1] Singet mitt frayt zumm Hah, diah gerechti, es is shiklich es di ufrichticha een preisa.
[2] Danket da Hah mitt harfa, singet lohb zu eem mitt zeyya kshtringdi harfa.
[3] Singet en nei leet zu eem; shpeelet shay un greishet naus mitt frayt.
[4] Fa's vatt fumm Hah is ufrichtich un voah, un eah is shtandhaftich in alles es eah dutt.
[5] Eah leebt gerechtichkeit un vass recht is; di eaht is foll mitt di shtandhaftich leevi fumm Hah.
[6] Da himmel voah gmacht bei's vatt fumm Hah, un alles es drinn is bei da ohften funn seim maul.
[7] Eah sammeld di vassahra fumm say zammah vi in en boddel; eah shtoaht's vassah fumm say in shtoah-heisah.
[8] Loss di gans eaht da Hah firchta; loss awl di leit in di veld een hohch achta.
[9] Fa eah hott kshvetzt, no voah's so kshaffa; eah hott gebodda gevva, un's hott so auskshaft.
[10] Da Hah macht da roht funn di heida zu nix kumma, un fadaubt vass di leit im sinn henn fa du.
[11] Da roht fumm Hah shtayt fa'immah, un di gedanka funn seim hatz ayvichlich.
[12] Ksaykend sinn di leit es da Hah iahra Gott macha, di leit es eah groofa hott fa sei eahbshaft sei.
[13] Da Hah gukt runnah fumm himmel, un saynd awl di kinnah funn mensha.
[14] Funn seim kaynich-shtool gukt eah naus, un saynd alli-ebbah uf di eaht.
[15] Eah macht awl iahra hatza, un eah fashtayt alles es si doon.
[16] En kaynich vatt nett aus di kfoah kalda deich sei feel greeks-gnechta; en greeks-gnecht hald sich nett frei bei sei grohsi graft.
[17] En gaul is en falshi hofning im greek, eah kann nimmand frei macha mitt sei grohsi graft.
[18] Di awwa fumm Hah sinn uf selli es een firchta, uf selli es iahra hofning in sei shtandhaftichi-leevi doon,
[19] so es eah iahra sayl fumm doht halda kann, un si am layva halda kann deich di hungahs-noht.
[20] Unsah sayl voaht uf da Hah; eah is unsah hilf un shield.
[21] Unsah hatz froit sich deich een, veil miah drauwa in sei heilichah nohma.
[22] Loss dei shtandhaftichi-leevi uf uns sei, oh Hah, vi miah unsah hofning in dich doon.