<Di Psaltah 3

[1] Oh Hah, vi feel sinn selli es mich hassa! Vi feel sinn selli es ufshtayn geyyich mich!

[2] Feel sawwa veyyich miah, “Gott zayld eem nett helfa.” (Sela)

[3] Avvah du bisht en shield um mich rumm, oh Hah, du gebsht miah eah un haybsht mei kobb uf.

[4] Ich roof zumm Hah mitt mei shtimm, un eah heaht mich funn seim heilicha hivvel. (Sela)

[5] Ich layk mich anna fa shlohfa; ich vekk viddah uf veil da Hah mich sayf hald.

[6] Ich feich mich nett veyyich feel dausends, es sich geyyich mich ksetzt henn uf alli seit.

[7] Shtay uf, oh Hah! Helf miah, oh mei Gott! Fa du shlaksht awl mei feinda uf da bakka; du fabrechsht di zay funn di ungettlicha.

[8] Di hilf kumd fumm Hah. Loss dei sayya uf dei leit kumma. (Sela)