[1] Oh Hah, denk an da Dawfit, un an alles es eah deich gmacht hott.
[2] Eah hott kshvoahra zumm Hah, un hott fashprocha zumm Mechticha Gott fumm Jakob:
[3] “Ich gay nett in mei haus, adda in mei bett;
[4] ich alawb kenn shlohf zu mei awwa kumma, un loss mei awwa-dekkel nett shlayfahrich vadda,
[5] biss ich en blatz finn fa da Hah, en haymet fa da Mechtich Gott fumm Jakob.”
[6] Gukk moll, miah henn keaht veyyich di Bundes-Lawt in Ephratha, miah henn see kfunna in di feldah funn Jaar,
[7] “Vella an sei voon-blatz gay, vella een ohbayda an sei foos-shtool.
[8] Shtay uf, oh Hah, un kumm zu dei Roo-Blatz, du un di Lawt funn dei Macht.
[9] Loss dei preeshtah geglayt sei mitt gerechtichkeit, un loss dei saylichi singa mitt frayt.”
[10] Fa di sayk fumm Dawfit dei gnecht, dray dei ksicht nett vekk funn dei ksalbdah.
[11] Da Hah hott kshvoahra zumm Dawfit, un funn demm drayt eah sich nett zrikk: “Ich zayl aynah uf dei kaynich-shtool setza, aynah es kumd aus deim leib.
[12] Vann dei boova mei bund halda, un mei zeiknisa es ich si lanna zayl, no doon iahra boova aw uf deim kaynich-shtool hokka fa'immah.”
[13] Fa da Hah hott Zion raus glaysa, un hott en falanga fa datt voona.
[14] “Dess is mei roo-blatz fa'immah, do vill ich voona veil's miah kfalla dutt.
[15] Ich zayl Zion saykna mitt alles es see brauch, ich zayl iahra oahmi satt macha mitt broht.
[16] Ich zayl iahra preeshtah glaydah mitt saylichkeit, un iahra saylichi zayla singa mitt frayt.
[17] Datt zayl ich's hann fumm Dawfit vaxa macha; ich habb en licht ufkokt fa mei ksalbdah.
[18] Ich zayl sei feinda glaydah mitt shohm, avvah da krohn uf sei kobb zayld sheina.”