[1] Gevvet dank zumm Hah, fa eah is goot; sei shtandhaftichi-leevi is ayvich.
[2] Loss selli es saylich sinn so sawwa, selli es eah aus noht frei-kshteld hott,
[3] selli es eah zammah gebrocht hott aus di lendah, funn di east un di west, un funn di natt un di saut.
[4] Dayl sinn rumm gloffa in di vildahnis, un henn kenn vayk finna kenna zu en shtatt es si drinn voona henn kenna.
[5] Si voahra hungahrich un dashtich, un iahra sayl hott hofning faloahra.
[6] No henn si naus groofa zumm Hah in iahra noht, un eah hott eena aus iahra druvvel kolfa.
[7] Eah hott si kfiaht im rechta vayk, zu en shtatt es si drinn voona henn kenna.
[8] Loss si da Hah danka fa sei shtandhaftichi-leevi, fa di vundahboahra sacha es eah dutt zu di mensha-kinnah.
[9] Fa eah macht di dashticha zufridda, un fild di hungahricha mitt goodi sacha.
[10] Dayl henn missa in oahrichi dunkli bletz hokka, si voahra kfanga un gebunna mitt kedda,
[11] veil si geyyich di vadda funn Gott kshaft henn, un henn's roht fumm Alli-Haychshta nunnah gedrayt.
[12] So hott eah iahra hatza nunnah glawda mitt haddi eahvet; si sinn kshtolbaht un's voah nimmand fa helfa.
[13] No henn si naus groofa zumm Hah in iahra noht, un eah hott eena aus iahra angsht kolfa.
[14] Eah hott si aus em deef dunkla gebrocht, un hott iahra kedda farissa.
[15] Loss si da Hah danka fa sei shtandhaftichi-leevi, fa di vundahboahri sacha es eah dutt zu di mensha-kinnah.
[16] Eah brecht eisichi deahra nunnah, un fabrecht di eisicha rikkel.
[17] Dayl voahra vi narra un henn missa leida deich iahra ivvah-dreddes un sinda.
[18] Awl's ess-sach hott eena gaygeld, un si voahra nayksht am doht.
[19] No henn si naus groofa zumm Hah in iahra noht, un eah hott eena aus iahra angsht kolfa.
[20] Eah hott sei vatt naus kshikt un si kayld, un hott si kalda funn shtauva.
[21] Loss si da Hah danka fa sei shtandhaftichi-leevi, fa di vundahboahra sacha es eah dutt zu di mensha-kinnah.
[22] Loss si dank-opfahra opfahra, un sei verka fazayla mitt frayt.
[23] Dayl sinn naus uf da say ganga mitt shiffah, un henn sich faseikt uf di grohsa vassahra.
[24] Si henn em Hah sei eahvet ksenna, un sei vundahboahri verka uf em say.
[25] Vo eah kshvetzt hott, is en shtoahm uf kumma, un hott di vella ufkshtatt.
[26] Di shiffah voahra uf kohva geyyich da himmel, un viddah nunnah glost zvishich di vella, biss di leit iahra sayl engshtlich voah deich di kfoah.
[27] Si sinn kshtolbaht un kshtaekkaht vi ksoffani; un henn sich kenn roht may gvist.
[28] No henn si naus zumm Hah groofa in iahra noht, un eah hott eena aus iahra angsht kolfa.
[29] Eah hott da shtoahm gmacht shtill sei, un di vella fumm say henn sich glaykt.
[30] No voahra si froh vo's shtill is vadda, un eah si an's land gebrocht hott noch iahra falanga.
[31] Loss si da Hah danka fa sei shtandhaftichi-leevi, fa di vundahboahra sacha es eah dutt zu di mensha-kinnah.
[32] Loss si een eahra vann di leit zammah kumma, un een lohva unnich di eldishti.
[33] Eah hott di revvahra in en drukkani vildahnis gmacht, un vassah-shpringa in dashtichah grund gedrayt.
[34] Eah hott's fruchtboah land salsich un veesht gmacht, veil selli ungettlich voahra es datt gvoond henn.
[35] Eah hott di drukka vildahnis zu vassah-lechah gedrayt, un da drukka grund zu vassah-shpringa.
[36] Eah hott di hungahricha glost datt bleiva, un hott si glost en shtatt bauwa fa drinn voona.
[37] Si henn feldah eiksayt un vei-goahra geblanst, un henn feel frucht abgnumma.
[38] Eah hott si ksaykend so es si sich oahrich fameaht henn, un hott iahra fee nett glost vennichah vadda.
[39] Avvah di leit sinn no viddah vennichah vadda, un sinn niddah gebrocht vadda deich aylend, druvvel un dreebsawl;
[40] eah macht shpott un fa'acht di evvahshta, un macht si rumm lawfa draus im veeshta vo kenn vayk is.
[41] Avvah eah haybt di oahma uf aus iahra leides, un fameaht iahra families vi en drubb fee.
[42] Di ufrichticha sayna dess un sinn froh, avvah's macht awl di ungerechta iahra maul zu.
[43] Veah-evvah es veisheit hott, loss een dee sacha achta, loss een ivvah em Hah sei shtandhaftichi-leevi denka.