[1] Ich vill da Hah lohva di gans zeit, sei lohb soll immah in meim maul sei.
[2] Mei sayl zayld braekka veyyich em Hah, so es di daymeedicha dess heahra un sich froiya.
[3] Preiset da Hah mitt miah, vella sei nohma uf hayva mitt-nannah.
[4] Ich habb da Hah ksucht, un eah hott miah andvat gevva, eah hott mich frei gmacht funn awl mei furcht.
[5] Selli es zu eem gukka sinn froh, iahra ksichtah braucha sich nee nett shemma.
[6] Deah oahm mann hott groofa, un da Hah hott een keaht, un hott een frei gmacht funn awl sei druvvel.
[7] Da engel fumm Hah bleibt um selli rumm es een firchta, un eah macht si frei.
[8] Fasuchet un saynet vi goot es da Hah is, ksaykend is da mann es eem draut an di zeit funn kfoah.
[9] Firchtet da Hah, diah saylichi, selli es een firchta, henn kenn noht.
[10] Di yunga layb gayn hungahrich un vadda shvach, avvah selli es da Hah sucha, henn kenn noht fa ennich goot ding.
[11] Kummet, mei kinnah, heichet mich ab; ich lann eich fa da Hah firchta.
[12] Veah is es es layva vill mitt frayt, un es feel goodi dawwa sayna vill?
[13] Hald dei zung funn evil, un dei leftz funn leeya sawwa.
[14] Dray vekk funn evil un du goot, such fridda un gay fridda nohch.
[15] Di awwa fumm Hah sinn uf di gerechta, un sei oahra heahra vann si een roofa.
[16] 'S ksicht fumm Hah is geyyich selli es evil doon, so es si gans fagessa sinn uf di eaht.
[17] Di gerechta roofa, un da Hah heaht si, un macht si frei funn awl iahra druvvel.
[18] Da Hah is nayksht zu selli es fabrochani hatza henn, un setz selli frei es moot faloahra henn.
[19] Da gerecht mann muss feel druvvel leida, avvah da Hah setzt een frei funn si awl;
[20] da Hah gebt acht uf awl sei gnocha; nett ayns funna zayld fabrocha gay.
[21] Evil bringd da doht zu di gottlohsa, un selli es di gerechta hassa zayla fadamd sei.
[22] Da Hah kawft sei gnechta iahra layva frei, un nimmand es eem draut zayld fadamd sei.