[1] Di himla sawwa veyyich di hallichkeit funn Gott; un iahra grohsi himmel-shpann veist vass sei hend kshaffa henn.
[2] Dawk noch dawk fazayla si dess, un nacht noch nacht gevva si eisicht.
[3] Si henn kenn vadda adda shprohcha, si braucha nett shvetza fa keaht sei.
[4] Doch, iahra shtimm gayt naus ivvah di gans eaht; un iahra vadda biss an's end funn di veld. In di himla hott eah en tent ufksetzt fa di sunn;
[5] see is vi en hochtzich-mann am aus sei shtubb kumma, un sich froit vi en shteikah mann am en race shpringa.
[6] See kumd uf an aym end funn di himla, un bleibt in iahra pawt biss an's annah end. Nix kann sich fashtekla funn iahra hitz.
[7] Es Ksetz fumm Hah is folkumma, un gebt nei layva zu di sayl. Es zeiknis fumm Hah kann gedraut sei, un gebt veisheit zu selli es nett fashtayn.
[8] Em Hah sei befayla sinn recht, un macha's hatz froh. Di gebodda fumm Hah sinn pyuah, un gevva licht zu di awwa.
[9] Di furcht fumm Hah is rein, un bleibt fa'immah. Di gerichta fumm Hah sinn voah, un sinn gans gerecht.
[10] Si sinn may veaht es gold, even's feinsht gold. Si sinn seesah es hunnich, even pyuahrah hunnich.
[11] Un deich si, dutt dei gnecht gvand vadda, veah si halda dutt, hott en grohsah lohn.
[12] Veah kann sei aykni faylah sayna? Fagebb miah di sinda es fashtekkeld sinn zu miah.
[13] Hald dei gnecht funn moot-villichi sinda, loss mei sinda nett roola ivvah mich. No zayl ich unshuldich sei, un frei sei funn grohsi sinda.
[14] Loss di vadda funn mei maul, un di gedanka funn mei hatz, diah kfellich sei, oh Hah, mei Felsa un mei Frei-Shtellah.