[1] Grohs is da Hah, un eah sett hohch gepreist sei, in di shtatt funn unsah Gott, uf sei heilicha hivvel.
[2] Shay un hohch, un di frayt funn di gans eaht is Zion, da berg funn Gott, di shtatt fumm Grohsa Kaynich.
[3] Gott is in di shtatt iahra greeks-heisah, un eah hott sich bekand gmacht es en sayfah Roo-Blatz.
[4] Di kaynicha henn sich fasammeld, un sinn mitt-nannah fassich kumma.
[5] Si henn di shtatt ksenna un voahra fashtaund, si voahra engshtlich un sinn difunn.
[6] Si henn geziddaht datt, mitt angsht vi en fraw am en kind havva.
[7] Mitt em east vind, hosht du di shiffah funn Tharsis fabrocha.
[8] Vi miah keaht henn, so henn miah ksenna in di shtatt fumm Awlmechticha Hah, in di shtatt funn unsah Gott. Gott macht di shtatt shtandhaftich shtay fa'immah. (Sela)
[9] In di mitt funn dei tempel, oh Gott, henn miah dei shtandhaftichi-leevi ivvah-gedenkt.
[10] Grawt vi dei nohma, oh Gott, so bisht du gepreist biss an's end funn di eaht, dei rechtsi hand is foll mitt gerechtichkeit.
[11] Loss da Berg funn Zion froh sei, un di dochtahra funn Juda sich froiya, veil dei gericht recht is.
[12] Lawfet um di shtatt Zion rumm, un zaylet iahra tavvahs.
[13] Gukket an iahra vanda, un nemmet acht funn iahra kaynich-heisah, so es diah eiyah nohch-kummashaft dess sawwa kennet.
[14] Fa deah Gott is unsah Gott fa'immah; eah fiaht uns biss an's end.