[1] Halleluja! 'Sis goot fa lohb singa zu unsah Gott, 'sis leeblich un recht fa een preisa.
[2] Da Hah baut Jerusalem uf un bringd di fashtroida funn Israel zammah.
[3] Eah hayld selli es fabrochani hatza henn, un bind iahra vayyi blakka uf.
[4] Eah zayld di shtanna, un naymd si awl bei nohma.
[5] Unsah Hah is grohs un mechtich; sei eisicht is unbegreiflich.
[6] Da Hah haybt di nunnah-gedreddana uf un shtohst di gottlohsa uf da bodda.
[7] Singet zumm Hah un seind dankboah; lohvet unsah Gott mitt harfa.
[8] Eah dekt di himla zu mitt volka; eah gebt reyyah uf di eaht, un macht's graws vaxa uf di hivla.
[9] Eah gebt foodah zumm fee, un zu di yunga grabba vann si roofa.
[10] Eah is nett uf gnumma mitt di graft funn en gaul, adda mitt di shteika bay funn en mann,
[11] avvah eah hott blesiah in selli es een firchta, in selli es iahra hofning in sei shtandhaftichi-leevi doon.
[12] Lohb da Hah, oh Jerusalem! Lohb dei Gott, oh Zion!
[13] Eah macht di rikkel funn dei doahra shteik, un saykend dei kinnah es in diah sinn.
[14] Eah hald fridda inseit deim land, un macht dich satt mitt em beshta vaytza.
[15] Eah shikt sei gebott uf di eaht, un sei vatt gayt shnell rumm.
[16] Eah gebt shnay vi vull, un shtroit reifa vi esh.
[17] Eah shmeist shlohsa es vi brokka; veah kann fannich sei keld shtay?
[18] Eah shikt sei vatt naus, un's ice fashmelst; eah macht sei vind blohsa, un's vassah lawft.
[19] Eah fakindicht sei vatt zumm Jakob, sei gebodda un adnunga zu Israel.
[20] Eah hott dess nett gedu fa ennichi anri leit; si vissa sei gebodda nett. Halleluja!