[1] Heich mei gebayt ab, oh Hah, vann ich naus roof fa hilf.
[2] Fashtekkel dei ksicht nett funn miah, an di zeit funn mei noht. Dray dei oah zu miah, un gebb miah kshvind andvat vann ich roof.
[3] Mei dawwa sinn am fagay vi shmohk, un mei gnocha am fabrenna vi im feiyah.
[4] Mei hatz is nunnah kshlauwa un fadatt vi graws, so es ich fagess mei broht essa.
[5] Deich mei laut yammahres binn ich yusht may haut un gnocha.
[6] Ich binn vi en fokkel in di vildahnis, vi en owl in en leahrah, dohdah blatz.
[7] Ich lei vakkah; ich binn vi en fokkel laynich uf em dach.
[8] Mei feinda zadda mich da gans dawk lang, un selli es mich fashpodda yoosa mei nohma fa en fluch.
[9] Ich ess esh vi broht, un awwa-vassah is in mei drinkes.
[10] Dess is deich dei grohsah zann, fa du hosht mich uf kohva un vekk kshmissa.
[11] Mei dawwa sinn vi da ohvet shadda, un ich fadatt vi graws.
[12] Avvah du, oh Hah, hoksht uf em kaynich-shtool fa'immah; dei nohma bleibt ayvichlich.
[13] Du zaylsht uf shtay un di shtatt Zion davvahra; es is zeit es du gnaydich bisht zu iahra, di zeit is do.
[14] Dei gnechta henn en grohsi leevi fa di shtatt iahra shtay, un davvahra iahra shtawb.
[15] Di heida zayla em Hah sei nohma firchta, un awl di kaynicha funn di eaht dei hallichkeit.
[16] Fa da Hah zayld Zion viddah ufbauwa, un zayld sich veisa in sei hallichkeit.
[17] Eah heicht di gebaydah ab funn di falossana; eah fa'acht iahra gebayt nett.
[18] Dess soll kshrivva sei fa selli es nohch kumma, so es selli es geboahra sei zayla, da Hah lohva sella.
[19] Da Hah hott runnah gegukt funn seim heilicha-blatz drovva in di hay, fumm himmel hott eah di eaht gegukt.
[20] Eah hott's geyammah keaht funn di kfangana, un hott selli lohs gedrayt es doht gmacht sei henn sella.
[21] Dess voah so es sei nohma fakindicht vatt in Zion, un eah glohbt vatt in Jerusalem,
[22] vann di leit un kaynich-reicha moll zammah kumma, fa da Hah deena.
[23] Eah hott mei graft funn miah gnumma, diveil es ich noch yung binn; eah hott mei dawwa fakatzt.
[24] Ich habb ksawt, “Mei Gott, nemm mich nett vekk in di mitt funn mei dawwa; dei yoahra bleiva fa'immah un immah.
[25] Am ohfang hosht du di foundation glaykt fa di eaht, un di himla sinn di eahvet funn dei hend.
[26] Si zayla awl fagay, avvah du bleibsht, si zayla awl ausveahra vi glaydah; vi glaydah dusht du si aus, un no vadda si vekk kshmissa.
[27] Avvah du bleibsht vi du bisht un dei yoahra zayla nee nett enda.
[28] Di kinnah funn dei gnechta zayla bleiva, un iahra nohch-kummashaft vatt ufgebaut fannich diah.”