[1] Heich uns ab, oh Heedah funn Israel; du fiahsht da Joseph vi en drubb shohf. Du, es uf em kaynich-shtool hoksht zvishich di cherubim, shein naus,
[2] fannich em Ephraim, em Benjamin un em Manasse. Shtah dei macht uf, un kumm un helf uns.
[3] Mach uns vass miah als voahra, oh Gott, un loss es licht funn dei ksicht uf uns sheina, so es miah kolfa sei kenna.
[4] Oh Hah, Almechtichah Gott, vi lang zaylsht du zannich sei mitt di gebaydah funn dei leit?
[5] Du hosht si kfeedaht mitt's broht funn awwa-vassah, un si gedrenkt mitt awwa-vassah bei di bowlfoll.
[6] Du losht unsah nochbahra fechta ivvah unsah land, un unsah feinda lacha unnich sich selvaht.
[7] Mach uns vass miah voahra, oh Almechtichah Gott, un loss es licht funn dei ksicht uf uns sheina, so es miah kolfa sei kenna.
[8] Du hosht en vei-shtokk aus Egypta gebrocht; du hosht di heida ausgedrivva un een geblanst.
[9] Du hosht's land grisht fa da vei-shtokk, un eah hott vatzla grikt un's land kfild.
[10] Di hivla voahra zu gedekt mitt sei shadda, un di mechticha cedar-baym mitt sei nesht.
[11] Sei nesht henn naus glangd biss an da say, un sei ranka biss an da Revvah.
[12] Favass hosht du sei vanda nunnah gebrocha, so es ennich ebbah es fabei gayt di drauva nemma kann?
[13] Di vilda sei fumm bush sauwa si nunnah, un di diahra funn di feldah fressa si.
[14] Kumm zrikk, oh Awlmechtichah Gott! Gukk runnah fumm himmel un sayn dess. Gebb acht uf deah vei-shtokk,
[15] da shtokk es dei rechtsi hand geblanst hott, da nasht es du shteik gmacht hosht fa dich selvaht.
[16] Si henn dei vei-shtokk nunnah kakt, un en fabrend mitt feiyah; bring si um vann du si ohguksht.
[17] Layk dei hand uf da mann an dei rechtsi seit, da sohn fumm mensh es du so shteik gmacht hosht;
[18] no drayya miah nee nimmi vekk funn diah. Loss uns layva, no doon miah dei nohma ohroofa.
[19] Mach uns vass miah voahra, oh Hah, Almechtichah Gott; loss es licht funn dei ksicht uf uns sheina, so es miah kolfa sei kenna.