[1] Ksaykend is sellah es sich bekimmaht veyyich di shvacha; da Hah gebt acht uf een im dawk funn druvvel.
[2] Da Hah hald een aus di kfoah un hald een levendich; eah saykend een im land, un lost een nett ivvah-gedrayt sei zumm villa funn sei feinda.
[3] Da Hah gebt acht uf een im bett funn grankheit; in sei grankheit, helfsht du eem viddah zrikk zu di ksundheit.
[4] Ich habb ksawt, “Oh Hah, sei bamhatzich zu miah; hayl mich, fa ich habb ksindicht geyyich dich.”
[5] Mei feinda shvetza evil veyyich miah un sawwa, “Vann zayld eah shtauva un sei nohma fagessa sei?”
[6] Vann si kumma mich sayna, shvetza si falshheit, in iahra hatza sinn si am gukka fa leshtahra; no gayn si naus un fazayles rumm heah.
[7] Awl selli es mich hassa pishbahra zu nannah veyyich miah; si denka di shlimshta sacha veyya miah,
[8] si sawwa, “En ungettlich ding is uf een kumma; eah zayld nee nimmi uf shtay funn vo eah leit.”
[9] Even mei beshtah freind es ich gedraut habb, sellah es funn mei broht gessa hott, is geyyich mich gedrayt, un hott uf mich gedredda mitt sei fees.
[10] Avvah du, oh Hah, sei gnaydich zu miah, un helf miah uf, so es ich si zrikk betzawla kann.
[11] Ich vays es du froh bisht mitt miah, veil mei feind sich nett froiya kann ivvah mich.
[12] Du hosht mich uf kohva veil ich du vass recht is un shtelsht mich ayvichlich fannich dich.
[13] Glohbt sei da Hah, da Gott funn Israel, funn ayvichkeit zu ayvichkeit! Amen un Amen!