[1] Ich leeb da Hah, veil eah mei shtimm un mei gebayt keaht hott.
[2] Veil eah mich abkeicht hott, zayl ich een ohroofa so lang es ich layb.
[3] Da shtrikk fumm doht hott mich kfanga, da angsht fumm grawb is ivvah mich kumma, ich voah ivvah-gnumma mitt bang un dreebsawl.
[4] No habb ich em Hah sei nohma ohgroofa: “Oh Hah, gebb mei sayl layva!”
[5] Da Hah is gnaydich un gerecht, unsah Gott is bamhatzich.
[6] Da Hah heet selli es sich nett selvaht helfa kenna, vo ich shvach voah, hott eah miah kolfa.
[7] Gay zrikk zu dei roo, mei sayl, fa da Hah voah goot zu diah.
[8] Du hosht mei sayl frei ksetzt fumm doht, mei awwa fumm awwa-vassah, un mei fees funn shtolbahra,
[9] so es ich nau fannich em Hah lawfa kann, im land funn di levendicha.
[10] Ich habb geglawbt, even vann ich ksawt habb, “Ich binn am oahrich leida.”
[11] Un in meim angsht habb ich ksawt, “Awl mensha sinn leeyah.”
[12] Vi kann ich da Hah zrikk betzawla fa alles goodes es eah dutt zu miah?
[13] Ich zayl's kobli funn di saylichkeit uf hayva, un zayl da nohma fumm Hah ohroofa.
[14] Ich betzawl zumm Hah vass ich fashprocha habb, fannich awl sei leit.
[15] Keshtlich in di awwa fumm Hah, is da doht funn sei saylichi.
[16] Oh Hah, ich binn dei gnecht; ich binn dei gnecht un da sohn funn dei mawt, du hosht mich lohs gmacht funn mei kedda.
[17] Zu diah zayl ich en dank-opfah macha, un da nohma fumm Hah ohroofa.
[18] Ich betzawl zumm Hah vass ich fashprocha habb, fannich awl sei leit,
[19] in di foah-hayf fumm Hah sei haus— in di mitt funn diah, oh Jerusalem. Halleluja!