[1] Singet mitt frayt zu Gott, unsah graft; greishet fraylich zumm Gott fumm Jakob.
[2] Fanget oh psaltah singa, shlauwet di drumma, un shpeelet di grohsa un glenna harfa.
[3] Blohset's blohs-hann an di zeit fumm Neiya-Moon un an di zeit fumm folla moon, uf unsah fesht-dawk.
[4] Dess is en ksetz fa Israel, en adning fumm Jakob sei Gott.
[5] Eah hott's gmacht es en zeiknis fa da Joseph vo eah naus ivvah's land Egypta ganga is. Ich habb en shprohch keaht es ich nett fashtanna habb,
[6] es ksawt hott, “Ich habb da lasht ab funn eiyah shuldra gnumma, un eiyah hend frei gmacht funn di shveahra keahb.
[7] Diah hend mich ohgroofa in eiyah noht, un ich habb eich kolfa, ich habb eich andvat gevva aus di gviddah-volk, un habb eich ausbroviaht am vassah funn Meribah. (Sela)
[8] Heichet, oh mei leit, zu mei vanning— vann diah yusht heicha daydet zu miah, oh Israel!
[9] Diah sellet kenn anrah gott unnich eich havva, un sellet kenn fremdah gott ohbayda.
[10] Ich binn da Hah eiyah Gott, deah vo eich ruff aus Egypta gebrocht hott. Machet eiyah meilah grohs uf, un ich fill si.
[11] Avvah mei leit henn mei shtimm nett abkeicht, Israel vill nix vissa funn miah.
[12] So habb ich si ivvah-gevva zu iahra dikk-kebbichi hatza, un si glost iahra ayknah roht nohch gay.
[13] Vann mei leit yusht heicha dayda zu miah! Vann Israel mei vayk nohch gay dayt,
[14] dann dayt ich kshvind iahra feinda unnich si du, un mei hand geyyich selli drayya es geyyich si sinn.
[15] Selli es da Hah hassa, mista sich beeya fannich eem, un iahra shtrohf veah ayvichlich.
[16] Avvah ich dayt eich feedra mitt em beshta vaytza; ich dayt eich satt macha mitt hunnich aus em felsa.”