[1] Matigi y'a fɔ Musa ye, ko a ka taa Faraon yɔrɔ k'a fɔ a ye ko Matigi, Hɛburuw ka Ala ko: «I ka ne ka mɔgɔw bila ka taa ka baara kɛ ne ye.
[2] Ni i ma sɔn ka u bila ka taa, ni i ye u minɛ ka to yan,
[3] a filɛ, i ka bagan minw bɛ kungo la, Matigi bolo na se olu ma ni bana jugu ye, i ka sow ni i ka faliw ani i kanyaamɛw ni i ka misiw ani i ka bagan misɛnw.
[4] Matigi na faranfasili kɛ Israɛl bɔnsɔn ka baganw ni Misirakaw ka baganw cɛ. Foyi tɛna sa Israɛl bɔnsɔn ka bagan si la.»
[5] Matigi ye waati latigɛ, a ko: «Sini Matigi na o kɛ jamana kɔnɔ.»
[6] O dugusajɛ Matigi ye o kɛ. Misirakaw ka baganw bɛɛ sara, nka foyi ma sa Israɛl ka bagan si la.
[7] Faraon ye ci bila ka ɲininkali kɛ. Ayiwa, a y'a sɔrɔ ko foyi ma sa Israɛl bɔnsɔn ka bagan si la. Nka Faraon dusukun gɛlɛyara, a ma mɔgɔw bila fewu.
[8] Matigi y'a fɔ Musa ni Aron ye ko: «Aw ka aw bolow fa gwantugu yɔrɔ bugurijɛ la. Musa ka o seri san fɛ Faraon ɲɛ kɔrɔ.
[9] A na kɛ gwangwan ye Misira jamana fan bɛɛ la. A na sumuniw bɔ. U na kɛ joli ye mɔgɔw ni baganw la Misira jamana fan bɛɛ la.»
[10] Musa ni Aron ye gwantugu yɔrɔ bugurijɛ ta k'u jɔ Faraon ɲɛ na. Musa ye o seri san fɛ, o ye sumuniw bɔ. U kɛra joli ye mɔgɔw ni baganw bɛɛ la.
[11] Dɔnbaaw ma se ka taa Musa yɔrɔ sumuniw kosɔn, katuguni sumuniw bɔra dɔnbaaw la i ko Misiraka tɔw bɛɛ.
[12] Matigi ye Faraon dusukun gɛlɛya. A ma u lamɛn. O kɛra ka kɛɲɛ ni Matigi ka kuma fɔlen ye Musa ye.
[13] O kɔ, Matigi y'a fɔ Musa ye, ko a ka soli ka wuli ka taa Faraon yɔrɔ k'a fɔ a ye ko Matigi, Hɛburuw ka Ala ko: «I ka ne ka mɔgɔw bila ka taa ka baara kɛ ne ye.
[14] Nin sen in na, ne na ne ka tɔɔrɔ kobaw lase i ni i ka jɔnw ani i ka mɔgɔw ma, walisa aw k'a dɔn ko ne bɔɲɔgɔnko si tɛ dugukolo kan.
[15] Ni ne tun ye ne bolo mɔɔnɔbɔ ka i ni i ka mɔgɔw gosi ni fiɲɛbana ye, aw tun na si tunun ka bɔ dugukolo kan.
[16] Nka tiɲɛ la nin de y'a to ne y'i to yen, walisa ne ka ne ka sebaaya jira i la, ani ne tɔgɔ ka bonya diɲɛ fan bɛɛ la.
[17] Halibi i b'i yɛrɛ bonya ne ka mɔgɔw kama, i tɛ sɔn ka u bila ka taa.
[18] A filɛ, sini ɲan tuma ne na sanbɛlɛ labi, o na juguya. O bɔɲɔgɔnko sanbɛlɛ ma kɛ Misira kabini a sigira fo ka na se sisan ma.
[19] Ayiwa, i ka ci bila sisan ko i ka baganw ni i ka fɛn minw bɛ kungo la, ko olu bɛɛ ka tɛliya ka na so. Mɔgɔw ni baganw, fɛn o fɛn tora kungo la, ni u ma na so, sanbɛlɛ na bi olu bɛɛ kan ka u bɛɛ faga.»
[20] Faraon ka mɔgɔ minw siranna Matigi ka kuma ɲɛ, olu ye u ka jɔnw ni u ka baganw ladon so kɔnɔ.
[21] Nka minw ma Matigi ka kuma jate, olu ye u ka jɔnw ni u ka baganw to kungo la.
[22] Matigi y'a fɔ Musa ye ko: «I ka i bolo kɔrɔta san fɛ, walisa sanbɛlɛ ka bi mɔgɔw bɛɛ ani baganw ni bin sifaw bɛɛ kan Misira jamana fan bɛɛ la.»
[23] Musa ye a ka bere kɔrɔta san fɛ. Matigi ye sanpɛrɛn ni sanbɛlɛ ci. Tasuma tun bɛ yaala dugukolo kan. Matigi ye sanbɛlɛ labi Misira jamana kan.
[24] Sanbɛlɛ ni tasuma kolonsolen bira. A juguyara fo o ɲɔgɔn tun ma kɛ Misira jamana la kabini a kɛra siya ye.
[25] Fɛn o fɛn tun bɛ kungo la, k'a daminɛ mɔgɔ la ka taa bila baganw la, sanbɛlɛ ye u bɛɛ gosi ka kungo kɔnɔ bin gosi ka kungo kɔnɔ jiriw bɛɛ kari Misira jamana yɔrɔ bɛɛ la.
[26] Israɛl bɔnsɔn sigilen tun bɛ Gosɛn jamana min na, sanbɛlɛ ma se o jamana yɔrɔ si la.
[27] Faraon ye Musa ni Aron wele k'a fɔ u ye ko: «Nin sen in na, ne ye jurumu kɛ. Matigi tilennen don, ne ni ne ka mɔgɔw jalaki don.
[28] Aw ka Matigi deli ko sanpɛrɛnba ni sanbɛlɛ kana kɛ tun. Ne na aw bila ka taa, aw tɛna to yan tun.»
[29] Musa y'a fɔ a ye ko: «Ni ne bɔra dugu kɔnɔ tuma min na, ne na ne bolow kɔrɔta Matigi ye. Sanpɛrɛn na ban, sanbɛlɛ fana tɛna kɛ tun, walisa i k'a dɔn ko dugukolo bɛɛ ye Matigi ta ye.
[30] Nka ne y'a dɔn ko i ni i ka jɔnw tɛna siran Matigi Ala ɲɛ fɔlɔ.»
[31] Len sun ni orje suman tiɲɛnna, katuguni orje tinzan tun bɔra, len tun feerela.
[32] Nka alikama ni ɲɔ ma tiɲɛn, katuguni u tun ma falen fɔlɔ.
[33] Musa bɔra Faraon yɔrɔ ka taa dugu kɔ fɛ. A ye a bolow kɔrɔta Matigi ye. Sanpɛrɛn ni sanbɛlɛ jɔra, sanji wora.
[34] Faraon y'a ye ko sanji ni sanpɛrɛn ni sanbɛlɛ jɔra, a tora ka jurumu kɛ. A ni a ka mɔgɔw ye u dusukunw gɛlɛya.
[35] Faraon dusukun gɛlɛyara. A ma Israɛl bɔnsɔn bila ka taa. O kɛra ka kɛɲɛ ni Matigi ka kuma fɔlen ye Musa da la.