[1] Israɛl bɔnsɔn bɔlen kɔ Misira jamana la, o kalo sabanan tile fɔlɔ, u donna Sinayi kungokolon kɔnɔ.
[2] U bɔra Rɛfidim ka se Sinayi kungokolon kɔnɔ ka buguw turu kungokolon kɔnɔ. U sigira kulu kuntilenna la yen.
[3] Musa yɛlɛnna ka taa Ala yɔrɔ. Matigi y'i to kulu kun na ka a wele. A ko: «I ka nin fɔ Yakuba ka so ye, Israɛl bɔnsɔn kɔni,
[4] ko ne ye min kɛ Misirakaw la, ani ne ye aw ta ka na ni aw ye ne yɔrɔ i n'a fɔ bɔn bɛ a denw ta a kaman kan cogo min na, aw ye o ye.
[5] Sisan ni aw ye ne kan minɛ ka ne ka layidu mara, aw na kɛ ne yɛrɛ taw ye ka tɛmɛn siya tɔw bɛɛ kan, k'a masɔrɔ dugukolo bɛɛ ye ne ta ye.
[6] Aw na kɛ sarakalasebaa masamaw ani siya senuma ye ne ye. I ka o kumaw fɔ Israɛl bɔnsɔn ye.»
[7] Musa ye mɔgɔw ka cɛkɔrɔbaw bɛɛ lajɛɲɔgɔn kan. Matigi ye kuma minw fɔ a ye, a ye olu bɛɛ fɔ u ɲɛ na.
[8] Mɔgɔw bɛɛ lajɛlen y'a jaabi ko: «Matigi ye min fɔ, an na o bɛɛ kɛ.» Musa ye mɔgɔw ka kuma kɔsegin Matigi ma.
[9] Matigi y'a fɔ Musa ye ko: «Ne bɛ na i ma sankaba fin na, walisa ni ne bɛ kuma i fɛ tuma min na, mɔgɔw k'a mɛn ka da i ka kuma la tuma bɛɛ.» Musa ye mɔgɔw ka kuma lase Matigi ma.
[10] Matigi y'a fɔ Musa ye ko: «I ka taa mɔgɔw yɔrɔ ka u saniya bi ani sini, ko u ka u ka finiw ko fana.
[11] U ka u labɛn sa ni tile saba cɛ, k'a masɔrɔ a tile sabanan don, Matigi yɛrɛ na jigin ka na Sinayi kulu kan mɔgɔw bɛɛ ɲɛ na.
[12] I ka dan sigi mɔgɔw ye kulu lamini la k'a fɔ mɔgɔw ye ko u ka u yɛrɛw kɔlɔsi, u kana yɛlɛn kulu kan, u kana maga a dan na. Ni fɛn o fɛn magara nin kulu la, o na faga.
[13] Bolo si kana maga o la, nka a na bon ni kabakurun ye, wala a na sɔgɔ ni biɲɛ ye, bagan fara mɔgɔ kan, o ɲɛnama kana to. Ni buru bɛ fyɛ tuma min na, u ka u madon kulu la.»
[14] Musa jiginna ka bɔ kulu kan ka taa mɔgɔw yɔrɔ ka mɔgɔw saniya. U ye u ka finiw ko fana.
[15] A y'a fɔ mɔgɔw ye ko: «Aw ka aw labɛn sa ni tile saba cɛ, aw kana gɛrɛ aw musow la.»
[16] O tile sabanan don sɔgɔma da fɛ, sankulukan ni san yɛgɛyɛgɛ ani sanfin kɛra kulu kun na. Burukan bɔra kosɛbɛ. Bugufyɛ la mɔgɔw bɛɛ yɛrɛyɛrɛla.
[17] O tuma la Musa ye mɔgɔw bɛɛ labɔ bugufyɛ la ka taa Ala kunbɛn. U y'u jɔ kulu kɛrɛ fɛ.
[18] Sinayi kulu fan bɛɛ kɛra sisi ye, katuguni Matigi jiginna tasuma la yen. O sisi yɛlɛnna i ko gwantugu sisi. Kulu bɛɛ yɛrɛyɛrɛla kosɛbɛ.
[19] Burukan tun bɛ bonya ka ta'a fɛ. Musa tun bɛ kuma, Ala tun bɛ a jaabi ni kanba ye.
[20] O cogo la Matigi jiginna ka na Sinayi kulu kan. Matigi ye Musa wele ka yɛlɛn ka na kulu kan. Musa yɛlɛnna ka taa yen.
[21] Matigi y'a fɔ Musa ye ko: «Jigin ka taa kangari da mɔgɔw ye k'a gɛlɛya u ma ko u kana girin ka dan yɔrɔ tɛmɛn ka gɛrɛ Matigi la k'a filɛ. N'o kɛra, u caman na sa.
[22] Sarakalasebaa minw bɛ gɛrɛ Matigi la, olu fana ka u yɛrɛw saniya, walisa a kana na u faga.»
[23] Musa y'a fɔ Matigi ye ko: «Mɔgɔw tɛ se ka gɛrɛ Sinayi kulu la, katuguni i yɛrɛ ye kangari da an ye k'a gɛlɛya an ma ko ne ka dan sigi ka kulu lamini ka a saniya.»
[24] Matigi y'a fɔ a ye ko: «Jigin ka taa, o kɔ, i ni Aron na yɛlɛn ka na ɲɔgɔn fɛ yan. Nka sarakalasebaaw ni mɔgɔ tɔw kana girin ka dan yɔrɔ tɛmɛn ka na Matigi fan fɛ, walisa a kana na u faga.»
[25] Musa jiginna ka taa mɔgɔw yɔrɔ ka o kow fɔ u ye.