[1] Musa tun bɛ a birankɛ Jɛtoro, Madian sarakalasebaa ka sagaw gɛn. A taara n'u ye kungoba la ka se Ala ka kuluba ma. O ye Horɛb ye.
[2] Matigi ka mɛlɛkɛ y'i jira a la k'i to tasuma la jirini cɛma. Musa y'a lajɛ. Jirini fan bɛɛ ye tasuma ye, nka a ma jeni.
[3] Musa ko: «Ne bɛ fara ka taa nin kabako lajɛ k'a dɔn min y'a to jirini tɛ jeni.»
[4] Matigi y'a ye ko Musa farala ka taa a filɛ. Ala y'i to jirini cɛma ka Musa wele. A ko: «Musa, Musa.» Musa ko: «Naamu.»
[5] Ala ko: «I kana gɛrɛ yan na. I ka sabara bɔ i sen na. I jɔlen bɛ yɔrɔ min na, o ye dugukolo senuma de ye.»
[6] A ko fana: «Ne ye i bɛnbaw ka Ala ye, Ibrahima ka Ala ni Isaka ka Ala ani Yakuba ka Ala.» Musa ye a ɲɛ datugu, katuguni a siranna ka Ala filɛ.
[7] Matigi ko: «Ne ka mɔgɔ minw bɛ Misira jamana la, ne ye olu tɔɔrɔ ko ye ka u kasikan mɛn u ka faama baara kuntigiw bolo. Ne bɛ u sɛgɛn kow dɔn.
[8] Ne jiginna walisa ka u tila Misirakaw la ka u labɔ o jamana la ka taa ni u ye jamana ɲuman la. O ka bon. A falen bɛ nɔnɔ ni di la fo ka woyo. Kanankaw ni Hɛti bɔnsɔn ani Amɔr siya ni Ferɛz siya ni Hɛv siya ka jamana don.
[9] Sisan ne ye Israɛl bɔnsɔn kasikan mɛn. Misirakaw bɛ u fanga digi u la ka u tɔɔrɔ cogo min na, ne y'o ye.
[10] Na sa, ne na i ci Faraon ma walisa i ka ne ka mɔgɔw Israɛl bɔnsɔn labɔ Misira.»
[11] Musa y'a fɔ Ala ye ko: «Ne ye jɔn ye ka taa Faraon yɔrɔ ka Israɛl bɔnsɔn labɔ Misira?»
[12] Ala ko: «Ne na to i fɛ. Taamashyɛn min b'a jira ko ne ye i ci, o ye nin de ye, ni i ye o mɔgɔw labɔ Misira tuma min na, aw na Ala bato nin kulu kan.»
[13] Musa y'a fɔ Ala ye ko: «Ayiwa ni ne taara Israɛl bɔnsɔn yɔrɔ k'a fɔ u ye, ko u bɛnbaw ka Ala ye ne ci u ma, ni u ye ne ɲininka a tɔgɔ la, ne na mun fɔ u ye?»
[14] Ala y'a fɔ Musa ye ko: «Min bɛ, ne don. I k'a fɔ Israɛl bɔnsɔn ye ten, ko: ‹NE BE, o de ye i ci u ma.›»
[15] Ala y'a fɔ Musa ye ko kura ko: «I k'a fɔ Israɛl bɔnsɔn ye ko Matigi, u bɛnbaw ka Ala, Ibrahima ka Ala ni Isaka ka Ala ani Yakuba ka Ala, o ye i ci u ma. O ye ne tɔgɔ ye badaa. U bɔnsɔn nataw bɛɛ na ne wele ten.
[16] I ka taa ka Israɛl cɛkɔrɔbaw lajɛ ɲɔgɔn kan k'a fɔ u ye ko ne, Matigi, aw bɛnbaw ka Ala, Ibrahima ka Ala ni Isaka ka Ala ani Yakuba ka Ala, ne ye ne jira i la k'a fɔ ko ne nana bɔ aw ye, ko min bɛ kɛ aw la Misira, ne ɲɛ bɛ o la.
[17] Ko ne ko ne na aw labɔ Misira jamana tɔɔrɔ la ka taa ni aw ye Kanankaw ni Hɛti bɔnsɔn ani Amɔr siya ni Ferɛz siya ni Hɛv siya ani Jebuskaw ka jamana la. O jamana falen bɛ nɔnɔ ni di la fo ka woyo.
[18] U na i kan lamɛn. I ni Israɛl cɛkɔrɔbaw na taa Faraon yɔrɔ k'a fɔ a ye ko: ‹Matigi, Hɛburuw ka Ala y'i jira anw na. Ko i ka sɔn an ka taa ka tile saba taama kɛ kungokolon kɔnɔ, walisa an ka saraka bɔ Matigi an ka Ala ye.›
[19] Ne y'a dɔn ko Misira masakɛ tɛna sɔn aw ka taa, fɔ ni a wajibiyara.
[20] Ne na ne bolo kɔrɔta ka Misira gosi ni ne ka kabako kɛtaw ye a cɛma. O kɔ, a na aw bila ka taa.
[21] Ne na nin siya ko diya Misirakaw ye. Ni aw taa tuma sera, aw bolo lankolon tɛna taa.
[22] Musow bɛɛ kelen-kelen n'a fɔ u fɛ mɔgɔw ni u sigi ɲɔgɔnw ye, ko u ka warijɛ fɛnw ni sanu fɛnw ani fini saramaw di u ma. Aw na o fɛnw don aw denkɛw ni aw denmusow kan na. Aw na Misirakaw bolo fɛnw cɛ.»