[1] Israɛl denkɛw ni u bɛɛ kelen-kelen ka denbaya minw nana Misira jamana la Yakuba fɛ, olu tɔgɔw filɛ ninw ye:
[2] Rubɛn ni Simeɔn ni Levi ni Juda
[3] ani Isakar ni Zabulɔn ni Benjamɛn
[4] ni Dan ni Nefitali ni Gad ani Asɛr.
[5] Yakuba bɔnsɔn minw nana Misira, olu tun ye mɔgɔ biwolonwula ye. A denkɛ Yusufu tun bɛ Misira ka ban.
[6] Yusufu ni a balimaw bɛɛ ani o waati mɔgɔw bɛɛ sara.
[7] Ayiwa, Israɛl bɔnsɔn ye den caman sɔrɔ. U jiidira ka caya kosɛbɛ. U fanga bonyara haali. O jamana fara u la.
[8] O tuma la masakɛ kura sigira Misira jamana kun na, o ma Yusufu dɔn.
[9] A y'a fɔ a ka mɔgɔw ye ko: «A filɛ, Israɛl bɔnsɔn ka ca ni an ye, u fanga ka bon ni an ta ye.
[10] A' ye na, an ka u ko ɲɛnabɔ ni hakilitigiya ye, n'o tɛ, u na caya kojugu. A n'a sɔrɔ ni kɛlɛ wulila tuma min na, u na fara an juguw kan ka an kɛlɛ. O kɔ, u na wuli ka bɔ jamana la.»
[11] O de y'a to Misirakaw ye faama baara kuntigiw sigi Israɛl bɔnsɔn kun na faama ci la, walisa olu ka u ɲɛgwan ni baara gɛlɛn ye. U ye nafolo mara duguw Pitɔn ni Ramsɛs jɔ Faraon ye.
[12] Nka u ye dɔ fara Israɛl bɔnsɔn tɔɔrɔli kan ka taa ɲɛ cogo min na, olu fana cayara ka taa ɲɛ ten ka jɛnsɛn. Misirakaw ye Israɛl bɔnsɔn koniya.
[13] Misirakaw ye Israɛl bɔnsɔn bila jɔnya baara gɛlɛn na.
[14] U ye u ɲɛgwan baara gɛlɛn na, bɔgɔ baara ni tufa gosi ani kungo la baara sifaw bɛɛ. U ye baara digi u la kojugu.
[15] Misira masakɛ kumana Heburu tin minɛlaw fana fɛ. Kelen tɔgɔ ko Sifra, dɔ tɔgɔ ko Pua.
[16] A ko: «Ni aw ye Heburu musow tin minɛ tuma min na ka a ye ko u bɛ jigin, ni cɛ don, aw ka a faga, ni muso don, a ɲɛnama ka to.»
[17] Nka tin minɛlaw siranna Ala ɲɛ. U ma Misira masakɛ kan minɛ, u ye denkɛw ɲɛnama to.
[18] Misira masakɛ ye tin minɛlaw wele k'a fɔ u ye ko: «Mun y'a to aw y'a kɛ ten ka denkɛw ɲɛnama to?»
[19] Tin minɛlaw ye Faraon jaabi ko: «Katuguni Heburu musow ni Misira musow tɛ kelen ye. U tin ka tɛli. U bɛ jigin sani tin minɛlaw ka na.»
[20] Israɛl bɔnsɔn jiidira ka caya kosɛbɛ. Ala ye ko ɲuman kɛ tin minɛlaw fana ye.
[21] Ala dubara tin minɛlaw ye ka u ka denbayaw jiidi kosɛbɛ sabu u siranna Ala ɲɛ.
[22] Faraon ye ci fɔ a ka mɔgɔw bɛɛ ye k'a gɛlɛya u ma ko: «Heburu denkɛ minw bɛ bange, aw ka olu bɛɛ fili baji la ka denmusow ɲɛnama to.»