[1] «Bezaleɛl ni Oholiab ani maɲɛrɛ dɔnnaw ka baara kɛ. Matigi ye hakilitigiya ni faamuli di u ma, walisa u ka yɔrɔ senuma baara fɛnw bɛɛ dila. U na o baara kɛ ka kɛɲɛ ni Matigi ka ci fɔlen ye.»
[2] Musa ye Bezaleɛl ni Oholiab wele. Matigi ye hakilitigiya don maɲɛrɛ dɔnna minw dusukun na, ani mɔgɔ o mɔgɔ dusukun y'a sama ka na ka baara kɛ, a ye olu fana wele.
[3] Israɛl bɔnsɔn nana ni u ka nili fɛn minw ye yɔrɔ senuma baara kɛli kama, o baarakɛlaw ye olu minɛ Musa bolo. Mɔgɔw nana Musa yɔrɔ ni diyaɲe nili fɛn dɔw ye sɔgɔma o sɔgɔma.
[4] O baarakɛla maɲɛrɛ dɔnna minw tun bɛ yɔrɔ senuma baara bɛɛ kɛ, olu ye u ka baara to yen ka taa Musa sɛgɛrɛ
[5] k'a fɔ a ye ko: «Matigi ye baara ko min fɔ, mɔgɔw bɛ na ni o baara mago fɛnw ye ka caya fo ka dama tɛmɛn kosɛbɛ.»
[6] Musa ko u ka welewele da bugufyɛ yɔrɔ bɛɛ la ko muso fara cɛ kan, mɔgɔ si kana na ni fɛn ye tun yɔrɔ senuma baara kama. U ye mɔgɔw bali ten, u ma na ni fɛn ye tun.
[7] Fɛn minw dira, olu ye o baara kɛta bɛɛ bɔ fo k'a tɔ to.
[8] Maɲɛrɛ dɔnna minw ye o baara kɛ, olu ye so dila ni fini jan tan ye. U dilara ni lenfu gese ye ani gese bulama ni lomaasa gese ani gese bilen, serubɛnw jaw kɛra u la maɲɛrɛ baarakɛ cogo la.
[9] Finiw bɛɛ kelen-kelen janya kɛra nɔnkɔn ɲɛ mugan ni segin ye. U bɛɛ kelen-kelen bonya kɛra nɔnkɔn ɲɛ naani ye. Finiw bɛɛ dama kɛɲɛna.
[10] U ye fini duuru kala ɲɔgɔn na, ka fini tɔ duuru fana kala ɲɔgɔn na.
[11] O fini duuru minw kalala ɲɔgɔn na, u ye nton bulamaw kɛ o fini duurunan dawolo la. Fini tɔ duuru minw kalala ɲɔgɔn na, u ye o ɲɔgɔn kɛ olu duurunan fana dawolo la.
[12] U ye nton biduuru kɛ o fini duurunan na, ka nton biduuru kɛ fini tɔ duurunan fana la. O ntonw sinna ɲɔgɔn ma.
[13] U ye sanu kolonin biduuru dila ka finiw tugu ɲɔgɔn na ni olu ye. So kɛra kelen ye o cogo la.
[14] U ye fini janw dila ni ba si ye, u ka kɛ so kunna birilan ye. U ye fini tan ni kelen dila.
[15] Finiw bɛɛ kelen-kelen janya kɛra nɔnkɔn ɲɛ bisaba ye. U bonya kɛra nɔnkɔn ɲɛ naani ye. O fini tan ni kelen dama kɛɲɛna.
[16] A ye o fini duuru kala ɲɔgɔn na ka o fini tɔ wɔɔrɔ fana kala ɲɔgɔn na.
[17] Fini duuru minw kalala ɲɔgɔn na, u ye nton biduuru kɛ o fini duurunan dawolo la. Fini tɔ wɔɔrɔ minw kalala ɲɔgɔn na, u ye nton biduuru kɛ olu wɔɔrɔnan fana dawolo la.
[18] U ye nsiranɛgɛ kolonin biduuru dila ka birifiniw tugu ɲɔgɔn na, walisa u ka kɛ kelen ye finiso kun na.
[19] U ye birilan dila ni sagajigi wolow ye, olu donna gala bilen na, ka birilan dɔ dila ni dofɛn wolow ye ka o biri u bɛɛ kun na.
[20] U ye so jiri fɛrɛnw dila ni zajɛ jiri ye ka u jɔ.
[21] Jiri fɛrɛnw bɛɛ kelen-kelen janya kɛra nɔnkɔn ɲɛ tan ye. U bɛɛ kelen-kelen bonya kɛra nɔnkɔn ɲɛ kelen ni tila ye.
[22] Sen fila kɛra jiri fɛrɛnw bɛɛ kelen-kelen na, u tugura ɲɔgɔn na. U ye so jiri fɛrɛnw bɛɛ kɛ o cogo la.
[23] U ye jiri fɛrɛn mugan dila so worodugu yanfan kama.
[24] U ye warijɛ jusigilan binaani kɛ jiri fɛrɛn mugan jukɔrɔ. Jusigilan fila-fila kɛra jiri fɛrɛnw bɛɛ kelen-kelen jukɔrɔ walisa a sen fila ka don olu la.
[25] So fan filanan la a saheli yanfan fɛ, u ye jiri fɛrɛn mugan dila yen
[26] ani u warijɛ jusigilan binaani. Jusigilan fila-fila kɛra jiri fɛrɛnw bɛɛ kelen-kelen jukɔrɔ.
[27] U ye jiri fɛrɛn wɔɔrɔ dila so kɔfɛla kama a tilebi yanfan fɛ.
[28] U ye jiri fɛrɛn fila-fila dila so kɔfɛla seleke fila kama.
[29] Olu kɛra fara fila ye ka bɔ duguma fo ka se san fɛ, u kunw sirila ɲɔgɔn na ko ɲuman ni nɛgɛ nkɔri ye. U seleke fila bɛɛ kɛra o cogo la.
[30] A kɛra jiri fɛrɛn segin ye, ani u warijɛ jusigilan tan ni wɔɔrɔ. Jusigilan fila-fila kɛra jiri fɛrɛnw bɛɛ kelen-kelen jukɔrɔ.
[31] U ye berew dila ni zajɛ jiri ye. Duuru kɛra so fan kelen ta ye,
[32] duuru kɛra so fan dɔ fana ta ye, duuru kɛra so kɔfɛla ta ye tilebi yanfan fɛ.
[33] Cɛmancɛ la bere min bɛ jiri fɛrɛnw cɛ tigɛ, o tɛmɛnna jiri fɛrɛnw bɛɛ kɔnɔ ka bɔ kun dɔ la ka taa se a kun dɔ ma.
[34] U ye sanu da jiri fɛrɛnw yɔrɔ bɛɛ kan ka sanu nkɔriw kɛ u la walisa berew ka don olu la. U ye sanu da berew yɔrɔ bɛɛ kan.
[35] U ye so cɛtigɛ fini dila ni gese bulama ni lomaasa gese ni gese bilen ani lenfu gese ye ka serubɛnw jaw dila a la maɲɛrɛ baarakɛ cogo la.
[36] U ye zajɛ jiri samasen naani dila a kama ka sanu da olu yɔrɔ bɛɛ kan. U ye sanu nkɔriw dila ka warijɛ yeele k'a kɛ u sigilan naani ye.
[37] U ye finiso dala fini dila ni gese bulama ni lomaasa gese ni gese bilen ani lenfu gese ye ka a sɔgɔ.
[38] U ye a samasen duuru ni u nɛgɛ ntolow dila. U ye sanu da samasenw kunna fɛnw ni u fini dulon berew kan. U jusigilan duuru dilara ni nsiranɛgɛ ye.