[1] Israɛl bɔnsɔn jama bɛɛ bɔra Sɛn kungokolon kɔnɔ ka taa ka taama ka kɛɲɛ ni Matigi ka ci fɔlen ye. U ye buguw turu Rɛfidim. Mɔgɔw ma ji minta si sɔrɔ yen.
[2] O de y'a to mɔgɔw tun b'a fɛ ka Musa kɛlɛ, u ko: «Ji minta di an ma, an k'a min.» Musa ye u jaabi ko: «Mun y'a to aw b'a fɛ ka ne kɛlɛ? Mun y'a to aw bɛ Matigi kɔrɔbɔ?»
[3] Minnɔgɔ gwanna mɔgɔw la yen. U ye dajukɔrɔ kuma fɔ Musa ma. U ko: «Mun y'a to i ye an labɔ Misira jamana la walisa anw ni an denw ni an ka baganw ka sa minnɔgɔ bolo?»
[4] Musa kasira Matigi nɔ fɛ ko: «Ne na mun kɛ nin mɔgɔw ye? U bɛ ɲini ka ne bon ni kabakurunw ye.»
[5] Matigi y'a fɔ Musa ye ko: «I ka taa mɔgɔw ɲɛ fɛ, i ni Israɛl cɛkɔrɔba dɔw. I ye baji gosi ni bere min ye, i ka o ta i bolo.
[6] A filɛ, ne na ne jɔ i ɲɛ Horɛb farakurun kan. I ka farakurun gosi. Ji na bɔ o la, mɔgɔw na o ji min.» Musa ye o kɛ Israɛl cɛkɔrɔbaw ɲɛ na.
[7] A ye o yɔrɔ tɔgɔ da ko Masa ani Mɛriba, Israɛl ka kɛlɛ kosɔn. U ye Matigi kɔrɔbɔ, u ko: «Matigi bɛ an cɛma wa, wala a tɛ an cɛma?»
[8] Amalɛk bɔnsɔn nana ka Israɛl bɔnsɔn kɛlɛ Rɛfidim.
[9] Musa y'a fɔ Josue ye ko: «I ka cɛ dɔw ɲɛnatɔmɔ an ka taa Amalɛk bɔnsɔn kɛlɛ. Sini ne na jɔ tintin kan ni Ala ka bere ye ne bolo.»
[10] Musa ye min fɔ, Josue y'o kɛ ka Amalɛk bɔnsɔn kɛlɛ. Musa ni Aron ani Hur yɛlɛnna tintin kan.
[11] Ni Musa tun ye a bolo kɔrɔta tuma o tuma, Israɛl bɔnsɔn tun bɛ barika sɔrɔ, nka ni a tun ye a bolo jigin tuma o tuma Amalɛk bɔnsɔn tun bɛ barika sɔrɔ.
[12] Nka Musa bolow jara. U ye kabakurun ta ka o bila Musa kɔrɔ, a y'i sigi a kan. Aron ni Hur ye a bolow kɔrɔta, kelen tun bɛ a fan kelen na, kelen tun bɛ a fan dɔ la. Musa bolow barika ma dɛsɛ fo ka tile bi.
[13] Josue ye se sɔrɔ Amalɛk ni a ka mɔgɔw kan ni npan ye.
[14] Matigi y'a fɔ Musa ye ko: «I ka nin ko sɛbɛn kitabu la ka a kɛ hakilijigin fɛn ye, i ka a fɔ Josue ye, ko ne na Amalɛk si tunun ka bɔ sankolo jukɔrɔ.»
[15] Musa ye saraka bɔlan jɔ yen ka o tɔgɔ da ko «Matigi, ne ka darapo.»
[16] A ko: «Matigi y'i kali ko a na Amalɛk kɛlɛ bɔnsɔn nataw bɛɛ la.»