[1] Israɛl bɔnsɔn jama bɛɛ bɔra Elim ka taa se Sɛn kungokolon kɔnɔ. O bɛ Elim ni Sinayi cɛ. U sera yen san kalo filanan tile tan ni duurunan don, u bɔlen kɔ Misira jamana la.
[2] Israɛl bɔnsɔn jama bɛɛ ye dajukɔrɔ kuma fɔ Musa ni Aron ma kungokolon kɔnɔ.
[3] Israɛl bɔnsɔn y'a fɔ u ye ko: «Hali ni an tun fagara Matigi bolo Misira jamana la, o tun ka fisa an ma. An sigilen tun bɛ sogo tobi dagaw kɔrɔ o yɔrɔ la ka buuru dun k'an fa. Aw nana ni an ye nin kungokolon kɔnɔ walisa nin jama bɛɛ ka sa kɔngɔ bolo yan.»
[4] Matigi y'a fɔ Musa ye ko: «Ne na dumuni fɛn lajigin aw ye ka bɔ sankolo la i ko sanji. Mɔgɔw na bɔ ka a cɛ don o don ka kɛɲɛ ni o don dumuni ye. Ne na u kɔrɔbɔ k'a filɛ ni u na ne ka sariya taama wala ni u tɛna a taama.
[5] U na min cɛ tile wɔɔrɔnan la, u ka o dila. Tile wɔɔrɔnan ta na kɛ tile kelen ta bɔɲɔgɔnko fila ye.»
[6] Musa ni Aron y'a fɔ Israɛl bɔnsɔn bɛɛ ye ko: «Bi wula fɛ aw n'a dɔn ko Matigi ye aw labɔ Misira jamana la.
[7] Sini sɔgɔma aw na Matigi nɔɔrɔ ye, k'a masɔrɔ aw ye dajukɔrɔ kuma min fɔ Matigi ma, a ye o mɛn. An dun ye mun ye fo aw bɛ dajukɔrɔ kuma fɔ an ma?»
[8] Musa ko: «Matigi na sogo di aw ma bi wula fɛ ka buuru di aw ma sini sɔgɔma ka aw fa. Matigi ye aw ka dajukɔrɔ kuma fɔlen mɛn a ma. An ye mun ye? Aw ma dajukɔrɔ kuma fɔ an ma, aw y'a fɔ Matigi de ma.»
[9] Musa y'a fɔ Aron ye, ko a k'a fɔ Israɛl bɔnsɔn jama bɛɛ ye ko: «Aw ka gɛrɛ Matigi la, sabu a ye aw ka dajukɔrɔ kuma mɛn.»
[10] Ka Aron to kuma la Israɛl bɔnsɔn jama fɛ, u y'u yɛlɛma ka kungokolon fan filɛ. Matigi nɔɔrɔ y'i jira kabasen na.
[11] Matigi kumana Musa fɛ ko:
[12] «Ne ye Israɛl bɔnsɔn ka dajukɔrɔ kuma mɛn. Taa k'a fɔ u ye ko u na sogo dun fitiri da fɛ, ko sini sɔgɔma u na fa dumuni la. O de kosɔn aw n'a dɔn ko ne ye Matigi, aw ka Ala ye.»
[13] Wula da fɛ kɔnɔ sifa dɔ nana ka bugufyɛ bɛɛ datugu. O dugusajɛ ngomi tun bɛ yɔrɔ bɛɛ la ka bugufyɛ lamini.
[14] O ngomi bannen kɔ, a filɛ, fɛn misɛn koolilen dɔ tun bɛ dugukolo kan kungokolon kɔnɔ yen. A tun ka misɛn i ko sanbɛlɛni jɛman.
[15] Israɛl bɔnsɔn y'o filɛ k'a fɔ ɲɔgɔn ye ko: «O ye mun ye?» U tun ma o fɛn dɔn. Musa y'a fɔ u ye ko: «Matigi bɛ dumuni fɛn min di aw ma k'a dun, o don.»
[16] Matigi ka ci filɛ nin ye: «Mɔgɔw bɛɛ kelen-kelen ka a cɛ ka kɛɲɛ ni u ka dumuni ye, mɔgɔ kelen, omɛr ɲɛ kelen, ka kɛɲɛ ni aw ka mɔgɔw dama ye. Cɛw bɛɛ kelen-kelen ka dɔ cɛ u ka so mɔgɔw ye.»
[17] Israɛl bɔnsɔn y'a kɛ ten. Dɔw ye caman cɛ, dɔw ye dɔɔnin cɛ.
[18] O kɔ, u y'a suma ni omɛr ye. Mɔgɔ minw ye caman cɛ, olu ta tɔ ma to. Minw ye dɔɔnin cɛ, olu ta ma dɛsɛ. U bɛɛ y'a cɛ ka kɛɲɛ ni u ka dumuni ye.
[19] Musa y'a fɔ u ye ko: «Mɔgɔ si ta tɔ kana si.»
[20] Nka hali o, u ma Musa kan lamɛn. Dɔw ta tɔ sira. Ntumuw donna a la, a kasa bɔra. Musa diminna u kɔrɔ.
[21] U y'a cɛ sɔgɔma o sɔgɔma, u bɛɛ kelen-kelen ka kɛɲɛ ni u ka dumuni ye. Ni tile gwanna, a tun bɛ yeele.
[22] Tile wɔɔrɔnan don u ye tile fila ta cɛ. U bɛɛ kelen-kelen ye omɛr fila-fila cɛ. Jama kuntigiw nana ka o fɔ Musa ye.
[23] Musa y'a fɔ u ye ko: «Matigi ye min fɔ, o don. Sini ye lafiɲɛ don ye, lafiɲɛ don senuma min bilara Matigi ye. Aw b'a fɛ ka min jiran, aw ka o jiran bi, aw b'a fɛ ka min balabala, aw ka o balabala bi. Aw k'a tɔ mara sini ɲɛ.»
[24] U ye dɔ bila fo ka dugujɛ i ko Musa y'a fɔ cogo min na. A kasa ma bɔ, ntumu si ma sɔrɔ a la.
[25] Musa ko: «Aw ka o dun bi, bi ye Matigi ka lafiɲɛ don ye. Aw tɛna foyi sɔrɔ kungo kɔnɔ bi.
[26] Aw na a cɛ tile wɔɔrɔ kɔnɔ, nka tile wolonwulanan don ye lafiɲɛ don ye, foyi tɛna sɔrɔ yen.»
[27] Tile wolonwulanan don mɔgɔ dɔw bɔra ko u bɛ dɔ cɛ, u ma foyi sɔrɔ.
[28] Ayiwa, Matigi y'a fɔ Musa ye ko: «Aw na to ka aw ban ne ka ci fɔlenw ni ne ka sariyaw marali ma fo tuma jumɛn?
[29] A filɛ, Matigi ye lafiɲɛ don di aw ma. O de y'a to a bɛ tile fila dumuni di aw ma tile wɔɔrɔnan la. Aw bɛɛ ka to aw ka yɔrɔ la. Mɔgɔ si kana bɔ a ka yɔrɔ la tile wolonwulanan don na.»
[30] Ayiwa, mɔgɔw y'u lafiya tile wolonwulanan don na.
[31] Israɛl bɔnsɔn ye o dumuni tɔgɔ da ko manɛ. A bɔlen bɛ ɲɔkisɛ fɛ, a tun ka jɛ. A tun ka timin i ko didɛgɛ.
[32] Musa y'a fɔ ko Matigi ye nin ci fɔ ko: «Aw ka manɛ omɛr ɲɛ kelen mara aw bɔnsɔn nataw bɛɛ ye. Ne ye dumuni min di aw ma kungokolon kɔnɔ, aw bɔlen kɔ Misira jamana la, u ka o ye.»
[33] Musa y'a fɔ Aron ye ko: «I ka daga dɔ ta ka manɛ omɛr ɲɛ kelen kɛ a kɔnɔ ka a bila Matigi ɲɛ kɔrɔ ka a mara aw bɔnsɔn nataw bɛɛ ye.»
[34] Aron ye o bila seereya wagande ɲɛ fɛ, i ko Matigi y'a fɔ Musa ye cogo min na.
[35] Israɛl bɔnsɔn ye manɛ dun san binaani kɔnɔ, sani u ka se mɔgɔma jamana la. U ye manɛ dun fo ka taa se Kanan jamana dan ma.
[36] Omɛr ɲɛ kelen ye efa tila tannan ye.