[1] Bezaleɛl ye wagande dila ni zajɛ jiri ye, a janya kɛra nɔnkɔn ɲɛ fila ni tila ye. A bonya kɛra nɔnkɔn ɲɛ kelen ni tila ye. A jɔ kundama kɛra nɔnkɔn ɲɛ kelen ni tila ye.
[2] A ye sanu yɛrɛwolo da a yɔrɔ bɛɛ kan ka sanu da a kɔkanna ni a kɔnɔna la ka sanu kɛ a da la kirinkirin ye ka a lamini.
[3] A ye sanu faga ka kɛ nkɔri naani ye ka olu don a sen naani la. Sanu nkɔri fila donna a fan kelen na, sanu nkɔri fila donna a fan dɔ la.
[4] A ye berew dila ni zajɛ jiri ye ka sanu da u yɔrɔ bɛɛ kan.
[5] A ye berew don sanu nkɔriw la wagande fan fila la tali kama.
[6] A ye jurumu kafari yɔrɔ dila ni sanu yɛrɛwolo ye. O janya kɛra nɔnkɔn ɲɛ fila ni tila ye, a bonya kɛra nɔnkɔn ɲɛ kelen ni tila ye.
[7] A ye serubɛn bisigi fila dila ni sanu fagalen ye jurumu kafari yɔrɔ kun fila la.
[8] A ye serubɛn kelen dila a kun kelen na ka serubɛn kelen dila a kun dɔ la. A ye serubɛnw dila jurumu kafari yɔrɔ kun fila la.
[9] O serubɛnw kamanfuraw sɛɛnɛna san fɛ jurumu kafari yɔrɔ kun na ka u kamanfuraw biri a kan ka u ɲɛ sin ɲɔgɔn ma. Serubɛnw ɲɛ sinna jurumu kafari yɔrɔ ma.
[10] A ye tabali dila ni zajɛ jiri ye. A janya kɛra nɔnkɔn ɲɛ fila ye. A bonya kɛra nɔnkɔn ɲɛ kelen ye. A jɔ kundama kɛra nɔnkɔn ɲɛ kelen ni tila ye.
[11] A ye sanu yɛrɛwolo da a yɔrɔ bɛɛ kan ka a da la kirinkirin kɛ ni sanu ye ka a lamini.
[12] A ye dawolo da o kirinkirin kan ka a lamini, o kolo giriya kɛra bolonkɔni naani da yɔrɔ ye. A ye sanu da kirinkirin dawolo kan ka a lamini.
[13] A ye sanu faga ka kɛ nkɔri naani ye tabali ye ka u don tabali seleke naani la a sen naani kɛrɛ fɛ.
[14] O sanu nkɔriw kɛra a dawolo kan kɔrɔ, olu kɛra tabali ta berew don yɔrɔ ye.
[15] A ye berew dila ni zajɛ jiri ye ka sanu da u yɔrɔ bɛɛ kan, olu kɛra tabali ta berew ye.
[16] A ye tabali kan minanw dila, a minan pɛnpɛrɛlenw ni a tasaw ni a bɛɛlɛw ani jifilenw, saraka bɔntaw kama. A ye u bɛɛ dila ni sanu yɛrɛwolo ye.
[17] A ye fitinɛba dila ni sanu yɛrɛwolo ye. A y'a dila ni sanu fagalen ye, a sen ni a kala ni a bɛɛlɛw ni a kuruw ani a feerew bɛɛ dilara ni sanu kuru kelen ye.
[18] Bolo wɔɔrɔ bɔra fitinɛ kala la. Fitinɛ bolo saba bɔra a kala fan kelen na, fitinɛ bolo saba dɔ bɔra a kala fan dɔ la.
[19] Amande jiriden bisigi saba ni u kuruw ni u feerew kɛra fitinɛ bolo kelen na. Amande jiriden bisigi saba dɔ ni u kuruw ni u feerew kɛra fitinɛ bolo dɔ la. Fitinɛ bolo wɔɔrɔ minw bɔra a kala la, olu bɛɛ kɛra o cogo la.
[20] Amande jiriden bisigi naani kɛra fitinɛ kala yɛrɛ la, ani u kuruw ni u feerew.
[21] Kuru kelen bɔra bolo fila fara yɔrɔ la ka bɔ kala la. Kuru kelen dɔ kɛra bolo fila dɔ fara yɔrɔ la ka bɔ kala la. Kuru sabanan kɛra bolo fila dɔ fara yɔro la ka bɔ kala la. Fitinɛ bolo wɔɔrɔ bɛɛ kɛra o cogo la.
[22] Fitinɛ kuruw ni a bolow kɛra ni sanu kuru kelen ye. A dilara ni sanu yɛrɛwolo fagalen kuru kelen ye.
[23] A ye fitinɛ bɛɛlɛ wolonwula ani a da bɔlanw ni a bugurijɛ cɛlanw dila ni sanu yɛrɛwolo ye.
[24] A ye fitinɛ ni a minanw bɛɛ dila ni sanu yɛrɛwolo kilo bisaba ye.
[25] A ye wusulan suma duman saraka bɔlan dila ni zajɛ jiri ye. A janya kɛra nɔnkɔn ɲɛ kelen ye. A bonya kɛra nɔnkɔn ɲɛ kelen ye. A fan naani kɛɲɛna. A jɔ kundama kɛra nɔnkɔn ɲɛ fila ye. Saraka bɔlan biɲɛkolow bɔra a yɛrɛ la.
[26] A ye sanu yɛrɛwolo da a yɔrɔ bɛɛ kan, a kunnala ani a kɛrɛw ani a biɲɛkolow ka a lamini, ka sanu kɛ a da la kirinkirin ye ka a lamini.
[27] A ye sanu nkɔriw kɛ a la a da la kirinkirin kan kɔrɔ, a fan fila la. A ye u kɛ a fan fila la ka kɛ saraka bɔlan ta berew don yɔrɔ ye.
[28] A ye berew dila ni zajɛ jiri ye ka sanu da u yɔrɔ bɛɛ kan.
[29] A ye munni tulu senuma dila ani wusulan suma duman yɛrɛwolo ka kɛɲɛ ni suma diyalanw dilabaa ka dilali cogo ye.