[1] U ye yɔrɔ senuma baarakɛ finiw dila ni gese bulama ni lomaasa gese ani gese bilen ye ka fini senumaw dila Aron ye, i ko Matigi y'a fɔ Musa ye cogo min na.
[2] U ye efɔd dila ni sanu ni gese bulama ni lomaasa gese ni gese bilen ani lenfu gese ye.
[3] U ye sanu faga ka a fiɲɛya ka a kɛ falafala ye ka a tigɛtigɛ ka kɛ sanu juru ye ka o ni gese bulama ni lomaasa gese ni gese bilen ani lenfu gese don ɲɔgɔn na maɲɛrɛ baara kɛ cogo la.
[4] U ye kaman kunna fɛn fila dila efɔd la, a kun fila tugura ɲɔgɔn na.
[5] A cɛ sirilan sɔgɔlen min b'a kan, o ni efɔd baarala cogo kelen na ni fɛn sifa kelen ye, sanu ni gese bulama ni lomaasa gese ni gese bilen ani lenfu gese, i ko Matigi y'a fɔ Musa ye cogo min na.
[6] U ye onikis kabakurunw dila ka u coron sanu kɔnɔ. Israɛl denw tɔgɔw ɲɛgɛnna u kan, i ko tɔgɔ taamashyɛn fɛnw bɛ ɲɛgɛn cogo min na.
[7] U ye olu da efɔd kaman kunna fɛnw kan. O kabakurunw ye hakilijigin fɛn ye Israɛl bɔnsɔn ko la, i ko Matigi y'a fɔ Musa ye cogo min na.
[8] U ye disila fɛn dila maɲɛrɛ baarakɛ cogo la i ko efɔd baarakɛ cogo, ni sanu ni gese bulama ni lomaasa gese ni gese bilen ani lenfu gese ye.
[9] A fan naani kɛɲɛna. U y'a kuru ka da ɲɔgɔn na. A janya ni a bonya kɛra sibiri ɲɛ kelen ye, a kurula fila ye.
[10] U ye kabakurun coronnenw sira naani kɛ a la. A sira fɔlɔ kɛra ni sardwane ni topaze ani emerode ye.
[11] Sira filanan kɛra ni eskarbukle ni safir ani luulu ye.
[12] Sira sabanan kɛra ni opale ni agate ani amɛtisite ye.
[13] Sira naaninan kɛra ni krisolite ni onikis ani jaspe ye. U coronna sanu fɛnw kɔnɔ.
[14] O kabakurunw kɛra tan ni fila ye ka kɛɲɛ ni Israɛl denw tɔgɔw ye. Israɛl siya tan ni fila tɔgɔ kelen-kelen ɲɛgɛnna o kabakurunw kelen-kelen kan, i ko tɔgɔ taamashyɛn fɛnw bɛ ɲɛgɛn cogo min na.
[15] U ye jɔlɔkɔw dila ni sanu yɛrɛwolo ye i ko juru dɛfɛlen, ka u kɛ disila fɛn na.
[16] U ye sanu fɛn fila dila, kabakurunw bɛ coron minw kɔnɔ, ani sanu nkɔri fila, ka o sanu nkɔriw siri disila fɛn kun fila la.
[17] U ye sanu jɔlɔkɔ dɛfɛlen fila don o sanu nkɔri fila kɔnɔ disila fɛn kun fila la,
[18] ka jɔlɔkɔ kun tɔ fila siri kaba coronnen fila la ka u siri efɔd kaman kunna fɛnw ɲɛfɛla la.
[19] U ye sanu nkɔri fila wɛrɛ dila ka u siri disila fɛn kun fila la a kɔfɛla la.
[20] U ye sanu nkɔri fila wɛrɛ dila ka u siri efɔd kaman kunna fɛn fila la u ɲɛfɛla jukɔrɔ, a kalasira kɛrɛ fɛ a cɛ sirilan san fɛ.
[21] U ye disila fɛn sanu nkɔriw ni efɔd sanu nkɔriw siri ɲɔgɔn na ni jala bulama ye, walisa disila fɛn ka to efɔd cɛ sirilan san fɛ, disila fɛn kana foni ka bɔ efɔd la. U ye o bɛɛ kɛ i ko Matigi y'a fɔ Musa ye cogo min na.
[22] U ye efɔd forokiya bɛɛ da ni gese bulama ye.
[23] U ye a kanda tigɛ ka saraba da a kan na ka a lamini, i ko nɛgɛ dulɔki dila cogo, walisa a kana fara.
[24] U ye gerenati jiriden bisigi don forokiya senkɔrɔla dawolo la ni gese bulama ni lomaasa gese ni gese bilen ani lenfu gese ye.
[25] U ye sanu yɛrɛwolo ntananw dila ka o ntananw don gerenati jiridenw ni ɲɔgɔn cɛ forokiya senkɔrɔla la ka a lamini. U kɛra gerenati jiridenw cɛ,
[26] ntanan kelen, gerenatiden bisigi kelen, ntanan kelen, gerenatiden bisigi kelen, forokiya senkɔrɔla dawolo la ka a lamini walisa baara ka kɛ i ko Matigi y'a fɔ Musa ye cogo min na.
[27] U ye turutiw da Aron ni a denkɛw ye ni lenfu gese ye,
[28] ka lenfu jalamugu ni banfulaw dila masiri kama ka kurusiw fana dila ni lenfu fini ye.
[29] U ye cɛ sirilan dila ni lenfu gese ye ka a sɔgɔ ni gese bulama ni lomaasa gese ani gese bilen ye, i ko Matigi y'a fɔ Musa ye cogo min na.
[30] U ye sanu yɛrɛwolo falafala senuma dila ka nin ɲɛgɛn a kan, i ko tɔgɔ taamashyɛn fɛnw bɛ ɲɛgɛn cogo min na ko, SENUMAYA MATIGI YE.
[31] U ye sanu falafala siri jalamugu sanfɛla la ni juru bulama ye, i ko Matigi y'a fɔ Musa ye cogo min na.
[32] O cogo la ɲɔgɔn kunbɛn finiso baara bɛɛ kɛra ka ban. Matigi ye min fɔ Musa ye, Israɛl bɔnsɔn ye o bɛɛ kɛ ka kɛɲɛ ni o ye.
[33] U nana ni finiso ni a fɛnw bɛɛ ye Musa yɔrɔ, a koloninw ni a jiri fɛrɛnw ani a bere janw ni a samasenw ani a jusigilanw
[34] ani a sagajigi wolo bilen birilan ni a dofɛn wolo birilan ni so cɛtigɛ fini
[35] ani seereya wagande ni a berew ni a jurumu kafari yɔrɔ
[36] ani tabali ni a minanw bɛɛ ni jirali buurukunw
[37] ani sanu yɛrɛwolo fitinɛ ni a bɛɛlɛ labɛnnenw ani a minanw bɛɛ ni fitinɛ tulu
[38] ani sanu saraka bɔlan ni munni tulu ni wusulan suma duman ni finiso datugu fini
[39] ani nsiranɛgɛ saraka bɔlan ni a kɔnɔ da nsiranɛgɛ ni a berew ani a minanw bɛɛ ni koli minanba ni a sigilan
[40] ani dukɛnɛ lamini finiw ni a lamini samasenw ani u jusigilanw ni dukɛnɛ minanw bɛɛ ani finiso datugu fini ni jurukisɛw ni a senw ani magoɲɛ minanw bɛɛ ɲɔgɔn kunbɛn finiso kama.
[41] U nana ni yɔrɔ senuma baarakɛ finiw ye, ani sarakalasebaa Aron ka fini senumaw ni a denkɛw ka finiw sarakalasebaaya baara kama.
[42] Matigi ye min fɔ Musa ye, Israɛl bɔnsɔn y'o bɛɛ kɛ a cogo la.
[43] Musa ye o baara bɛɛ sɛgɛsɛgɛ. A filɛ, Matigi y'a fɔ Musa ye cogo min na, u y'a bɛɛ kɛ o cogo la. Ayiwa, Musa ye dubaw kɛ u ye.