[1] Matigi y'a fɔ Musa ye ko: «Ne na tɔɔrɔ ko kelenpe kɛ Faraon ni Misira la tun. O kɔ, a na aw bila ka taa. Ni a ye aw bila, a na aw gɛn yɛrɛ.
[2] I k'a fɔ mɔgɔw ye, ko cɛw bɛɛ ni musow bɛɛ ka warijɛ fɛnw ni sanu fɛnw deli u sigiɲɔgɔnw fɛ.»
[3] Matigi ye mɔgɔw ko diya Misirakaw ye. Musa jatera mɔgɔba ye Misira jamana la Faraon ka faamaw ni Misira jamana mɔgɔw bɛɛ fɛ.
[4] Musa y'a fɔ Faraon ye ko: «Matigi ko ni dugu tilara tuma min na, ale na wuli ka taa Misira jamana yaala.
[5] Misira jamanaden fɔlɔw bɛɛ na sa k'a daminɛ masakɛ Faraon den fɔlɔ la ka taa bila jɔnmuso susulikɛla den fɔlɔ la. Baganw den fɔlɔw fana na sa.
[6] Su kasikanba na kɛ Misira jamana fan bɛɛ la. O ɲɔgɔn ma kɛ fɔlɔ, a tɛna kɛ tun.
[7] Nka hali wulu kelen tɛna kasi Israɛl bɔnsɔn mɔgɔ si la, wala u ka bagan la, walisa aw k'a dɔn ko Matigi bɛ faranfasi don Misirakaw ni Israɛl cɛ.
[8] I ka mɔgɔ minw filɛ ninw ye, olu bɛɛ bɛ na ne yɔrɔ ka u biri ne kɔrɔ k'a fɔ ko an ka taa ka bɔ yan, ne ni ne ka mɔgɔw. O kɔ, ne na bɔ jamana la.» Musa diminnenba bɔra Faraon kɔrɔ.
[9] Matigi y'a fɔ Musa ye ko: «Faraon tɛna i lamɛn, walisa ne ka kabakow ka caya Misira jamana la.»
[10] Musa ni Aron ye o kabakow bɛɛ kɛ Faraon ɲɛ kɔrɔ, nka Matigi ye Faraon dusukun gɛlɛya. A ma sɔn ka Israɛl bɔnsɔn bila ka taa ka bɔ a ka jamana la.