[1] Matigi kumana Musa fɛ ko:
[2] «I ka kuma Israɛl bɔnsɔn fɛ ko u ka nili fɛnw di ne ma. Mɔgɔ minw bɛ ne sɔn ni diyaɲe ye, i ka olu bɛɛ ka nili fɛnw minɛ.
[3] I bɛ nili fɛn minw minɛ u fɛ, o filɛ ninw ye: sanu, warijɛ, nsiranɛgɛ,
[4] gese bulama, lomaasa gese, gese bilen, lenfu gese ni ba si fana,
[5] sagajigi wolo minw donna gala bilen na, dofɛn wolow, zajɛ jiri,
[6] fitinɛ tulu ni suma diyalanw, u na kɛ munli tulu ni wusulan suma dumanw la,
[7] onikis kabakurunw ani kabakurun dɔw efɔd ni disila fɛn kama.
[8] U ka yɔrɔ senuma dila ne ye, walisa ne ka sigi u cɛma.
[9] Aw ka finiso ni a minanw dila ka kɛɲɛ ni ne ka bisigi jiralen ye.
[10] «U ka wagande dila ni zajɛ jiri ye. A janya ka kɛ nɔnkɔn ɲɛ fila ni tila ye, a bonya ka kɛ nɔnkɔn ɲɛ kelen ni tila ye, a jɔ kundama ka kɛ nɔnkɔn ɲɛ kelen ni tila ye.
[11] I ka sanu yɛrɛwolo da a yɔrɔ bɛɛ kan ka sanu da a kɔkanna ni a kɔnɔna la, ka sanu kɛ a da kirinkirin ye k'a lamini.
[12] I ka nkɔri naani dila ni sanu fagalen ye ka olu don a sen naani la, sanu nkɔri fila ka don fan kelen na, a tɔ fila ka don fan dɔ la.
[13] I ka berew dila ni zajɛ jiri ye ka sanu da u yɔrɔ bɛɛ kan.
[14] I ka berew don sanu nkɔriw la wagande fan fila la. U na wagande ta ni olu ye.
[15] O berew ka to wagande sanu nkɔriw la, u kana bɔ u la.
[16] Ne na seereya min di i ma, i ka o bila wagande kɔnɔ.
[17] I ka jurumu kafari yɔrɔ dila ni sanu yɛrɛwolo ye. A janya ka kɛ nɔnkɔn ɲɛ fila ni tila ye, a bonya ka kɛ nɔnkɔn ɲɛ kelen ni tila ye.
[18] I ka serubɛn bisigi fila dila ni sanu ye. I ka u dila ni sanu fagalen ye jurumu kafari yɔrɔ kun fila la.
[19] I ka serubɛn kelen dila a kun kelen na ka serubɛn kelen dila kun dɔ la. I ka o serubɛnw dila jurumu kafari yɔro kun fila la.
[20] O serubɛnw ka u kamanfuraw sɛɛnɛ san fɛ jurumu kafari yɔrɔ kun na ka u kamanfuraw biri a kan ka u ɲɛ sin ɲɔgɔn ma. Serubɛnw ɲɛ ka sin jurumu kafari yɔrɔ ma.
[21] I ka jurumu kafari yɔrɔ da wagande kan. Ne na seereya min di i ma, i ka o bila wagande kɔnɔ.
[22] Ne na i kunbɛn o yɔrɔ la. Ka ne to jurumu kafari yɔrɔ san fɛ, seereya wagande kan serubɛn fila cɛma, ne na ne ka ciw fɔ i ye, i ka u fɔ Israɛl bɔnsɔn ye.
[23] «I ka tabali dila ni zajɛ jiri ye. A janya ka kɛ nɔnkɔn ɲɛ fila ye, a bonya ka kɛ nɔnkɔn ɲɛ kelen ye, a jɔ kundama ka kɛ nɔnkɔn ɲɛ kelen ni tila ye.
[24] I ka sanu yɛrɛwolo da a yɔrɔ bɛɛ kan ka a da la kirinkirin kɛ ni sanu ye k'a lamini.
[25] I ka dawolo dila tabali la k'a lamini. A kolo giriya ka kɛ bolonkɔni naani da yɔrɔ ye ka sanu kɛ o dawolo la kirinkirin ye k'a lamini.
[26] I ka nkɔri naani dila tabali la ni sanu ye ka u don a seleke naani la a sen naani kɔrɔ.
[27] O sanu nkɔriw ka kɛ a dawolo kan kɔrɔ. U ka kɛ a ta berew don yɔrɔ ye.
[28] I ka berew dila ni zajɛ jiri ye ka sanu da u yɔrɔ bɛɛ kan. U ka tabali ta ni olu ye.
[29] I ka a minan pɛnpɛrɛlenw ni a tasaw ni a bɛɛlɛw ni a jifilenw dila saraka bɔntaw kama. I ka u bɛɛ dila ni sanu yɛrɛwolo ye.
[30] I ka jirali buurukunw sigi tabali kan ne ɲɛ kɔrɔ tuma bɛɛ.
[31] «I ka fitinɛ dila ni sanu yɛrɛwolo ye. A ka dila ni sanu fagalen ye. A sen ni a kala ni a bɛɛlɛw ni a kuruw ani a feere bisigiw bɛɛ ka dila ni sanu kuru kelen ye.
[32] Bolo wɔɔrɔ ka kɛ fitinɛ kala la. Fitinɛ bolo saba ka bɔ a kala fan kelen na, fitinɛ bolo saba dɔ ka bɔ a kala fan dɔ la.
[33] Amande jiriden bisigi saba ani kuruw ni feere bisigiw ka kɛ fitinɛ bolo kelen na. Amande jiriden bisigi saba dɔ ani kuruw ni feere bisigiw ka kɛ fitinɛ bolo dɔ la. Fitinɛ bolo wɔɔrɔ minw bɛ bɔ a kala la, olu bɛɛ ka kɛ ten.
[34] Amande jiriden bisigi naani ka kɛ fitinɛ kala yɛrɛ la ani u kuruw ni u feere bisigiw.
[35] Kuru kelen ka kɛ bolo fila fara yɔrɔ la ka bɔ kala la. Kuru kelen ka kɛ bolo fila dɔ fara yɔrɔ la. Kuru sabanan ka kɛ bolo fila dɔ fara yɔrɔ la. Fitinɛ bolo wɔɔrɔ bɛɛ ka kɛ ten.
[36] Kuruw ni bolow ka kɛ ni sanu kuru kelen ye, fitinɛ bɛɛ ka dila ni sanu yɛrɛwolo fagalen kuru kelen ye.
[37] I ka fitinɛ da wolonwula dila fitinɛ la. U ka o fitinɛ daw mana, walisa u ka yeelen bɔ a ɲɛ fɛ.
[38] Fitinɛ da bɔlanw ni a bugurijɛ cɛlanw ka dila ni sanu yɛrɛwolo ye.
[39] Fitinɛ ni a minanw bɛɛ ka dila ni sanu yɛrɛwolo kilo bisaba ye.
[40] Bisigi minw jirala i la ka i to kulu kan, i ka i yɛrɛ kɔlɔsi ka u bɛɛ dila ka kɛɲɛ ni o ye.