[1] Matigi y'a fɔ Musa ye ko:
[2] «A filɛ, ne ye Uri denkɛ Bezaleɛl ɲɛnatɔmɔ ka bɔ Juda bɔnsɔn na. Uri fa tun ye Hur ye.
[3] Ne ye Bezaleɛl fa Ala Ni la ka hakilitigiya ni faamuli ni dɔnniya di a ma, walisa a ka baara sifaw bɛɛ cogo dɔn,
[4] ka maɲɛrɛ baara cogo kura dabɔ ka sanu ni warijɛ ni nsiranɛgɛ baara kɛ,
[5] ka kabakurun sɔngɔ gɛlɛnw dɛsɛ coronli kama ka jiri dɛsɛ ka baara sifaw bɛɛ kɛ.
[6] A filɛ, ne ye Ahisamak denkɛ Oholiab di a ma k'a kɛ a dɛmɛbaa ye ka bɔ Dan bɔnsɔn na. Ne ye hakilitigiya don maɲɛrɛ dɔnnaw bɛɛ dusukun na fana, walisa ne ye ci minw fɔ i ye, u ka se ka olu bɛɛ kɛ.
[7] Ɲɔgɔn kunbɛn finiso ni seereya wagande ni jurumu kafari yɔrɔ min bɛ a kan, ani finiso minanw bɛɛ,
[8] ni tabali ni a minanw bɛɛ ani sanu fitinɛ yɛrɛwolo ni a minanw bɛɛ ni wusulan suma duman saraka bɔlan
[9] ani saraka jenita saraka bɔlan ni a minanw bɛɛ ni koli minanba ni a sigilan
[10] ani baarakɛ finiw, ni sarakalasebaa Aron ka fini senumaw ani a denkɛw ka finiw, sarakalasebaaya baara kama,
[11] ani munli tulu ni yɔrɔ senuma wusulan suma duman, u ka olu bɛɛ kɛ ka kɛɲɛ ni ne ka ci fɔlen ye.»
[12] Matigi y'a fɔ Musa ye
[13] ko a ka kuma Israɛl bɔnsɔn fɛ ko: «Aw ka ne ka lafiɲɛ donw bila, k'a masɔrɔ o ye taamashyɛn ye ne ni aw cɛ aw bɔnsɔn nataw bɛɛ la, walisa aw k'a dɔn ko ne ye Matigi aw saniyabaa ye.
[14] O de y'a to aw ka lafiɲɛ don bila, k'a masɔrɔ o na kɛ don senuma ye aw ye. Ni mɔgɔ o mɔgɔ ye lafiɲɛ don nɔgɔ, o na faga. Mɔgɔ min bɛ baara dɔ kɛ o don na, o tigi na gɛn ka bɔ a ka mɔgɔw cɛma.
[15] Aw ka baara kɛ tile wɔɔrɔ kɔnɔ nka tile wolonwulanan ye lafiɲɛ don de ye, lafiɲɛ don senuma don Matigi ye. Mɔgɔ min bɛ baara dɔ kɛ lafiɲɛ don na, o na faga.
[16] Israɛl bɔnsɔn ka lafiɲɛ don bila ka a mara u bɔnsɔn nataw bɛɛ la ka o kɛ layidu wulibali ye.
[17] O ye taamashyɛn ye ne ni Israɛl bɔnsɔn cɛ badaa, katuguni Matigi ye sankolo ni dugukolo da tile wɔɔrɔ kɔnɔ, a ka baara bannen, a y'i lafiya tile wolonwulanan don.»
[18] Matigi tilalen kɔ kuma la Musa fɛ Sinayi kulu kan, a ye seereya walaha fila di Musa ma. O kabakurun walahaw sɛbɛnna Ala bolonkɔni fɛ.