[1] «I ka wusulan suma duman saraka bɔlan dila. I ka a dila ni zajɛ jiri ye.
[2] A janya ka kɛ nɔnkɔn ɲɛ kelen ye. A bonya ka kɛ nɔnkɔn ɲɛ kelen ye. A fan naani ka kɛɲɛ. A jɔ kundama ka kɛ nɔnkɔn ɲɛ fila ye. I ka biɲɛkolow dila saraka bɔlan na.
[3] I ka sanu yɛrɛwolo da a yɔrɔ bɛɛ kan, a kunnala ni a kɛrɛw ani a biɲɛkolow ka a lamini. I ka sanu kɛ a da la kirinkirin ye ka a lamini.
[4] I ka sanu nkɔri fila kɛ a la a da la kirinkirin kan kɔrɔ ka u kɛ a fan fila la a seleke naani la. U ka kɛ a ta berew don yɔrɔw ye.
[5] I ka berew dila ni zajɛ jiri ye ka sanu da u yɔrɔ bɛɛ kan.
[6] I ka o saraka bɔlan sigi so cɛtigɛ fini ɲɛ fɛ, o bɛ seereya wagande ɲɛ fɛ, seereya kan jurumu kafari yɔrɔ ɲɛ. Ne bɛ na i kunbɛn yen.
[7] Aron ka wusulan suma duman wusu o saraka bɔlan kan. Sɔgɔma o sɔgɔma fitinɛ labɛn tuma la, a ka o wusu.
[8] Ni Aron bɛ fitinɛ daw mana wula da fɛ tuma min na, a ka o wusuli kɛ. Wusulan suma duman wusuli don Matigi ɲɛ kɔrɔ aw bɔnsɔn nataw cɛma.
[9] Aw kana wusulan suma duman sifa wɛrɛ wusu a kan. Aw kana saraka jenita wala mugu saraka lase a kan. Aw kana saraka bɔnta bɔn a kan.
[10] Aron ka jurumu kafari a biɲɛkolow kan siɲɛ kelen san o san. Jurumu yafa saraka min bɛ jurumu kafari, a ka o joli kɛ ka jurumu kafari a kan siɲɛ kelen san o san aw bɔnsɔn nataw bɛɛ la. O ye fɛn senuma senuma ye Matigi ye.»
[11] Matigi kumana Musa fɛ, a ko:
[12] «Ni i bɛ Israɛl bɔnsɔn dan ka u dama dɔn, u bɛɛ kelen-kelen ka u yɛrɛ ni kunmabɔ wari di Matigi ma, walisa fiɲɛbana kana u sɔrɔ u dan waati la.
[13] U na min di, o filɛ: Mɔgɔ minw danna, olu bɛɛ kelen-kelen ka warijɛ sikle tila di ka kɛɲɛ ni yɔrɔ senuma sikle ye. Sikle ye gera mugan ye. O sikle tila na kɛ Matigi sɔn fɛn ye.
[14] Mɔgɔ o mɔgɔ jatera o danni la, k'a daminɛ u si san mugan la fo ka taa se u ɲɛ mɔgɔw ma, u bɛɛ kelen-kelen ka Matigi sɔn fɛn di.
[15] Ni aw bɛ Matigi sɔn fɛn di ka aw ni kunmabɔ, fɛntigi kana dɔ fara sikle tila kan, faantan kana dɔ bɔ a la.
[16] I ka ni kunmabɔ wari minɛ Israɛl bɔnsɔn fɛ ka a bila ɲɔgɔn kunbɛn finiso baara kama, walisa a ka kɛ hakilijigin fɛn ye Israɛl bɔnsɔn ko la Matigi ɲɛ kɔrɔ ka aw yɛrɛw ni kunmabɔ.»
[17] Matigi y'a fɔ Musa ye ko:
[18] «I ka koli minanba ni a sigilan dila ni nsiranɛgɛ ye mɔgɔw koli kama k'a sigiɲɔgɔn kunbɛn finiso ni saraka bɔlan furancɛ la ka ji kɛ a la.
[19] Aron ni a denkɛw ka u bolow ni u senw ko yen.
[20] Ni u bɛ don ɲɔgɔn kunbɛn finiso kɔnɔ tuma min na, u ka u bolow ni u senw ko o ji la, walisa u kana na sa, ani ni u bɛ gɛrɛ saraka bɔlan na ka baara kɛ ka saraka jenitaw lase Matigi ma.
[21] U na u bolow ni u senw ko o cogo la, walisa u kana na sa. O na kɛ sariya wulibali sigilen ye u ye, Aron ni a bɔnsɔn nataw bɛɛ la.»
[22] Matigi y'a fɔ Musa ye ko:
[23] «I ka suma diyalanw bɛɛ la ɲuman dɔ ta. I ka mirɛ woyota kilo duuru ta ani sinamome suma duman kilo fila ani tila, o ye mirɛ dama tilancɛ ye, ani kala suma duman kilo fila ani tila
[24] ani kase suma duman kilo duuru, ka kɛɲɛ ni yɔrɔ senuma ka jate cogo ye, ani olive mɔ tulu litiri wɔɔrɔ.
[25] I ka olu kɛ munli tulu senuma ye, tulu suma duman, a ka dila ka kɛɲɛ ni suma diyalanw dilabaa ka baara kɛ cogo ye, o na kɛ munli tulu senuma ye.
[26] I ka ɲɔgɔn kunbɛn finiso mun n'a ye, ani seereya wagande
[27] ani tabali ni a minanw bɛɛ ani fitinɛ ni a minanw ani wusulan suma duman saraka bɔlan
[28] ani saraka jenita saraka bɔlan ni a minanw bɛɛ ani koli minanba ani a sigilan.
[29] I ka o fɛnw saniya, u na kɛ fɛn senumaw ye. Ni fɛn o fɛn magara u la, o fana na kɛ fɛn senuma ye.
[30] I ka Aron ni a denkɛw mun ka u saniya, walisa u ka sarakalasebaaya baara kɛ ne ye.
[31] I k'a fɔ Israɛl bɔnsɔn ye ko: ‹Nin na kɛ munli tulu senuma suma duman ye ne ye aw bɔnsɔn nataw bɛɛ la.
[32] A kana mun mɔgɔ si fari la. Aw kana a bɔɲɔgɔnko munli tulu si dila ka kɛɲɛ ni o dila cogo ye. A senuma don, aw ka a jate fɛn senuma ye.
[33] Mɔgɔ o mɔgɔ mana a bɔɲɔgɔnko dila, wala min ye a dɔ mun mɔgɔ wɛrɛ la, o tigi na gɛn ka bɔ a ka mɔgɔw la.›»
[34] Matigi y'a fɔ Musa ye ko: «I ka suma diyalanw dɔ ta, sitakte ni ongle ani galbanum ani suma diyalan mana yɛrɛwolo, i ka olu bɛɛ kelen-kelen dama kɛɲɛ.
[35] I ka u ɲaami ɲɔgɔn na ka u kɛ suma duman ye, a jɛlen senuma, a ka dila ka kɛɲɛ ni suma diyalanw dilabaa ka dilali cogo ye. Kɔgɔ ka kɛ a la.
[36] I ka a dɔ susu k'a kɛ mugu ye ka o bila seereya ɲɛ fɛ ɲɔgɔn kunbɛn finiso kɔnɔ. Ne bɛna aw kunbɛn o yɔrɔ la. O na kɛ fɛn senuma senuma ye aw ye.
[37] Aw kana o wusulan suma duman ɲɔgɔn dila aw yɛrɛw ye, ka kɛɲɛ ni a dila cogo ye. Aw ka o jate fɛn senuma ye Matigi ye.
[38] Mɔgɔ o mɔgɔ mana o ɲɔgɔn dila ka a sumusumu, o tigi na gɛn ka bɔ a ka mɔgɔw la.»