[1] Matigi kumana Musa ni Aron fɛ Misira jamana la, a ko:
[2] «Nin kalo na kɛ aw ka kalo fɔlɔ ye. A na kɛ aw ka san daminɛ kalo ye.
[3] Aw ka kuma Israɛl jama bɛɛ fɛ k'a fɔ u ye, ko nin kalo tile tannan don, u bɛɛ kelen-kelen ka sagadenw minɛ u ka gwaw ye, gwa kelen, sagaden kelen.
[4] Ni gwa ka dɔgɔ sagaden ma, a ni a kɛrɛfɛ gwa ka jɛ sagaden kelen na ka kɛɲɛ ni u ka mɔgɔw dama ye. Sagaden na jate ka kɛɲɛ ni mɔgɔw bɛɛ kelen-kelen ka dumuni ye.
[5] Aw ka san kelen sagajigi fiɲɛntan wala san kelen bakɔrɔ fiɲɛntan minɛ.
[6] Aw ka o mara fo nin kalo tile tan ni naaninan don. Israɛl jama bɛɛ ka o faga tile bi da fɛ.
[7] U bɛ saga dun so minw kɔnɔ, u ka joli ta ka o seriseri o sow da la kondon jiri fila ani a bon da sanfɛ jiri kan.
[8] U ka saga sogo wusulen ni buuru fununbali ani nakɔɲugu kunama dun o su yɛrɛ la.
[9] Aw kana a mɔbali dun wala a balabalalen ji la, nka a ka wusu tasuma la, a kunkolo ni a senw ni a kɔnɔ fɛnw.
[10] A tɔ si kana si. Ni a tɔ sira, aw ka o jeni ni tasuma ye sɔgɔma da fɛ.
[11] Aw cɛ sirilen, sabaratigi, beretigi ka a dun tɛliya la. O ye Matigi ka Tɛmɛnkan seli ye.
[12] «O su yɛrɛ la ne na Misira jamana yaala. Ne na Misirakaw den fɔlɔw bɛɛ faga, k'a daminɛ mɔgɔw la ka taa bila baganw la. Ne na jalaki tɔɔrɔ bi Misira bato fɛnw bɛɛ kan. Ne ye Matigi de ye.
[13] Aw na kɛ so minw kɔnɔ, o joli na kɛ aw ka taamashyɛn ye o daw la. Ne na o joli ye, ne na tɛmɛn aw kan. Ni ne bɛ Misira jamana gosi tuma min na, fiɲɛbana si tɛna aw sɔrɔ ka aw halaki.
[14] Nin don na kɛ hakilijigin don ye. Aw na a kɛ seli donba ye Matigi ye. A ka kɛ laada wulibali ye aw bɔnsɔn nataw ye.»
[15] Matigi ko: «Aw ka buuru fununbali dun tile wolonwula kɔnɔ. O don fɔlɔ yɛrɛ la aw na funun fɛnw bɛɛ bɔ aw ka sow kɔnɔ k'a masɔrɔ mɔgɔ o mɔgɔ bɛ buuru fununnen dun kabini o don fɔlɔ fo ka taa se don wolonwulanan ma, o tigi na gɛn ka bɔ Israɛl la.
[16] O don fɔlɔ la jamalajɛ senuma ka kɛ, jamalajɛ senuma ka kɛ a don wolonwulanan fana la. Aw kana baara si kɛ o donw la fɔ aw ka dumuni labɛn baara.
[17] Aw ka buuru fununbali seli kɛ, k'a masɔrɔ ne ye aw ka jamaw labɔ Misira jamana la nin don yɛrɛ la. Aw ka o seli don bila k'a kɛ laada wulibali ye aw bɔnsɔn nataw bɛɛ la.
[18] San kalo fɔlɔ tile tan ni naaninan tile bi da fɛ, aw ka buuru fununbali dun fo ka taa se o kalo tile mugan ni kelennan tile bi da ma.
[19] Funun fɛn si kana sɔrɔ aw ka sow kɔnɔ o tile wolonwula kɔnɔ. K'a masɔrɔ mɔgɔ o mɔgɔ be buuru fununnen dun, siginfɛ fara jamanaden kan, o tigi na gɛn ka bɔ Israɛl jama la.
[20] Aw kana buuru fununnen si dun. Aw ka buuru fununbali dun aw ka sow bɛɛ kɔnɔ.»
[21] O tuma la Musa ye Israɛl cɛkɔrɔbaw bɛɛ wele k'a fɔ u ye ko: «A' ye taa ka sagadenw minɛ ka kɛɲɛ ni aw ka gwa mɔgɔw ye ka Tɛmɛnkan saraka faga.
[22] Aw ka hisope jiri fura dɔw ta ka u su joli la minan dɔ kɔnɔ ka o joli seriseri bon da sanfɛ jiri ani da la kondon jiri fila kan. Aw si kana bɔ aw ka sow kɔnɔ sani dugu ka jɛ.
[23] Ni Matigi bɛ tɛmɛn ka Misirakaw gosi tuma min na, ni a ye o joli ye bon da sanfɛ jiri ani da la kondon jiri fila kan, Matigi na tɛmɛn o so da kan. A tɛna sɔn halakilikɛla ka don aw ka sow kɔnɔ ka aw gosi.
[24] O na kɛ laada ye aw ni aw bɔnsɔn ye badaa.
[25] Matigi na jamana min di aw ma ka kɛɲɛ ni a ka layidu ye, ni aw donna yen tuma min na, aw ka nin laada senuma kɛ.
[26] Ni aw denw ye aw ɲininka tuma min na, ko nin laada kɔrɔ ye mun ye,
[27] aw ka u jaabi ko nin ye Matigi ka Tɛmɛnkan saraka ye, katuguni a tɛmɛnna Israɛl bɔnsɔn ka sow kan Misira jamana la. A ye Misirakaw gosi tuma min na, an ka sow kisira.» O tuma la mɔgɔw bɛɛ ye u biri duguma ka batoli kɛ.
[28] Matigi ye min fɔ Musa ni Aron ye, Israɛl bɔnsɔn taara ka o kɛ.
[29] Dugu tila fɛ Matigi ye Misira jamanaden fɔlɔw bɛɛ faga, k'a daminɛ masakɛ Faraon den fɔlɔ la fo ka taa bila kaso la jɔnkɛ den fɔlɔ la ka baganw den fɔlɔw fana faga.
[30] Faraon ni a ka faamaw bɛɛ ani Misirakaw bɛɛ wulila dugu tila fɛ. Kasikanba bɔra Misira jamana la, katuguni so si ma to ni saya ma kɛ min na.
[31] O su yɛrɛ la Faraon ye Musa ni Aron wele k'a fɔ u ye ko: «Aw ka wuli ka taa ka bɔ ne ka mɔgɔw cɛma, aw ni Israɛl bɔnsɔn bɛɛ. A' ye ta baara kɛ Matigi ye i ko aw y'a fɔ cogo min na.
[32] A' ye taa ni aw ka bagan misɛnw ni aw ka bagan kunbaw fana ye, i ko aw y'a fɔ cogo min na. Aw ka taa. Aw ka dubaw kɛ ne ye fana.»
[33] Misirakaw ye o mɔgɔw jija ka u bila ka bɔ jamana la tɛliya la. U ko: «An bɛɛ bɛna sa.»
[34] Mɔgɔw ye u ka mugu nɔɔninen fununbali ta. U ye u ka buuru dogi minanw siri u ka finiw la ka u da u kamankun na.
[35] Israɛl bɔnsɔn ye o kɛ ka kɛɲɛ ni Musa ka kuma fɔlen ye. U ye warijɛ fɛnw ni sanu fɛnw ni finiw deli Misirakaw la.
[36] Matigi ye mɔgɔw ko diya Misirakaw ye. U ye fɛn minw deli, Misirakaw ye olu bɛɛ di u ma. U ye Misirakaw bolo fɛn dilenw cɛ.
[37] Israɛl bɔnsɔn bɔra Ramsɛs ka taa se Sukɔt u sen na. U tun bɛ cɛ waa kɛmɛ wɔɔrɔ bɔ, musow ni denmisɛnw sen t'o la.
[38] Siya wɛrɛw jamaba taara u fɛ, ani bagan misɛnw ni bagan kunbaw caman fana taara u fɛ.
[39] U ye mugu nɔɔninen min ta u bolo ka bɔ Misira, u ye o fununbali jeni. A ma funun, katuguni u gɛnna ka bɔ Misira jamana la. U tun ma yɔrɔ sɔrɔ ka dumuni dila.
[40] Israɛl bɔnsɔn ye san kɛmɛ naani ni bisaba kɛ Misira.
[41] O san kɛmɛ naani ni bisaba laban don yɛrɛ la, Matigi ka jama bɛɛ bɔra Misira jamana la.
[42] O su na kɛ seli donba ye Matigi ye, katuguni Matigi ye u labɔ Misira jamana la. Israɛl bɔnsɔn nataw bɛɛ na o su kɛ seli donba ye Matigi ye.
[43] Matigi y'a fɔ Musa ni Aron ye ko: «Tɛmɛnkan dumuni laada ye nin ye. Siginfɛ si kana a dun.
[44] I bɛ jɔn min san wari la, ni i ye o boloko, o bɛ se ka a dun.
[45] Siginfɛ ani baaraden kana a dun.
[46] A bɛ dun so kelen kɔnɔ. A sogo si kana taa kɛnɛma. Aw kana a kolo si kari.
[47] Israɛl jama bɛɛ ka Tɛmɛnkan seli kɛ.
[48] Ni siginfɛ sigira aw cɛma, ni a b'a fɛ ka Tɛmɛnkan seli kɛ Matigi ye, a ka so kɔnɔ cɛw bɛɛ ka boloko fɔlɔ, o kɔ, a bɛ se ka o seli kɛ i ko jamanaden. Nka mɔgɔ bolokobali si kana a dun.
[49] Sariya kelen bɛ jamanaden ni siginfɛ kan.»
[50] Matigi ye ci min fɔ Musa ni Aron ye, Israɛl bɔnsɔn y'a kɛ ten.
[51] O don yɛrɛ la Matigi ye Israɛl bɔnsɔn labɔ Misira jamana la ka kɛɲɛ ni u ka jamaw ye.