[1] Matigi kumana Musa fɛ ko:
[2] «I k'a fɔ Israɛl bɔnsɔn ye, ko u ka u yɛlɛma ka taa buguw turu Pi-Hahirɔt, Migdol ni kɔgɔji cɛ, Bal-Zɛfɔn ɲɛ fɛ. Aw na buguw turu a kuntilenna la kɔgɔji da la.
[3] Faraon n'a fɔ Israɛl bɔnsɔn ta fan fɛ ko u fililen tununna kungokolon kɔnɔ.
[4] Ne na Faraon dusukun gɛlɛya, a na u nɔgɛn. Faraon ni a ka kɛlɛbolo bɛɛ na kɛ bonyali sababu ye. Misirakaw n'a dɔn ko ne ye Matigi de ye.» Israɛl bɔnsɔn y'a kɛ ten.
[5] A fɔra Misira masakɛ ye, ko o mɔgɔw bolila ka taa. Faraon ni a ka faamaw dusu yɛlɛmana mɔgɔw ko la. U ko: «Mun y'a to an ye nin kɛ, ka Israɛl bɔnsɔn bila ka bɔ an ka baara la?»
[6] Faraon ye a ka wotoro ni a ka mɔgɔw labɛn ka taa.
[7] A ye wotoro ɲuman kɛmɛ wɔɔrɔ ani Misira wotoro tɔw bɛɛ ta. Kɛlɛ kuntigiw tun bɛ u bɛɛ kun na.
[8] Matigi ye Misira masakɛ Faraon dusukun gɛlɛya. Faraon ye Israɛl bɔnsɔn nɔgɛn. Israɛl bɔnsɔn kun kɔrɔtalen bɔra.
[9] Misirakaw ye Israɛl nɔgɛn, Faraon ka sow ni a ka wotorow ani a ka sotigiw ni a ka kɛlɛbolow. U kura Israɛl la olu ka bugufyɛ la kɔgɔji da la, Pi-Hahirɔt fan fɛ, Bal-Zɛfɔn kuntilenna la.
[10] Faraon gɛrɛla u la tuma min na, Israɛl bɔnsɔn ye u ɲɛw kɔrɔta ka Misirakaw natɔ ye u kɔ fɛ. Israɛl bɔnsɔn siranna kosɛbɛ ka kasi Matigi nɔ fɛ.
[11] U y'a fɔ Musa ye ko: «Kaburu si tun tɛ Misira jamana la fo i nana ni an ye nin kungokolon kɔnɔ an ka sa yan wa? Mun y'a to i ye an labɔ Misira jamana la?
[12] K'an to Misira, an m'a fɔ i ye ko i k'a to an ka baara kɛ Misirakaw ye wa? Ka baara kɛ Misirakaw ye, o ka di an ye ni saya ye kungokolon kɔnɔ yan.»
[13] Musa ye mɔgɔw jaabi ko: «Aw kana siran foyi la. Aw ka to aw ka yɔrɔw la. Matigi na aw kisi cogo min na, aw ka o filɛ. Aw ɲɛ bɛ Misiraka minw la bi, aw tɛna u ye tun abada.
[14] Matigi na kɛlɛ kɛ aw ye, aw kɔni ka sabali.»
[15] Matigi y'a fɔ Musa ye ko: «Mun y'a to i bɛ kasi ne nɔ fɛ? I k'a fɔ Israɛl bɔnsɔn ye ko u ka wuli ka taa ɲɛ.
[16] E kɔni ka i ka bere kɔrɔta ka i bolo yankan kɔgɔji kun na ka a cɛ tila fila ye. Israɛl bɔnsɔn na taama gwele kan kɔgɔji cɛma.
[17] Ne kɔni, ne na Misirakaw dusukun gɛlɛya, olu na tugu u nɔ fɛ. Ne na bonyali sɔrɔ Faraon ni a ka kɛlɛbolo bɛɛ kosɔn ani a ka wotorow ni a ka sotigiw kosɔn.
[18] Ni ne ye bonyali sɔrɔ Faraon ni a ka wotorow kosɔn ani a ka sotigiw kosɔn tuma min na, Misirakaw n'a dɔn ko ne ye Matigi de ye.»
[19] Ala ka mɛlɛkɛ min tun bɛ taa Israɛl ɲɛ, o yɛlɛmana ka taa u kɔ fɛ. Kabasen fana bɔra u ɲɛ ka jɔ u kɔ fɛ.
[20] A donna Misirakaw ka daga ni Israɛl ka bugufyɛ cɛ. O kabasen fan kelen kɛra dibi ye, a fan dɔ ye yeelen bɔ su fɛ. U ma gɛrɛ ɲɔgɔn na o su bɛɛ la.
[21] Musa ye a bolo yankan kɔgɔji kun na. Matigi ye kɔgɔji ɲɔni ni kɔrɔn fɛ fiɲɛba ye su fɛ. Kɔgɔji cɛ tilara fila ye ka kɛ gwele ye.
[22] Israɛl bɔnsɔn donna kɔgɔji cɛma gwele kan. Ji kɛra kogo ye u kinin ni u numan fɛ.
[23] Misirakaw ye u nɔgɛn, Faraon ka sow bɛɛ ni a ka wotorow ni a ka sotigiw donna u nɔ fɛ kɔgɔji cɛma.
[24] Dugujɛ da fɛ, ka Matigi to tasuma ni kabasen na, a ye Misira kɛlɛbolo filɛ ka u koɲaami.
[25] A ye u ka wotorow senw bɔ ka u ka taama gɛlɛya fo Misirakaw ko: «An ka boli Israɛl ɲɛ, k'a masɔrɔ Matigi bɛ an kɛlɛ u ye.»
[26] Matigi y'a fɔ Musa ye ko: «I bolo yankan kɔgɔji kun na, walisa ji ka segin Misirakaw ni u ka wotorow ni u ka sotigiw kan.»
[27] Musa ye a bolo yankan kɔgɔji kun na. Dugujɛlen, kɔgɔji seginna a nɔ na. Misirakaw bolila a ɲɛ. Matigi ye u bɛɛ labi kɔgɔji cɛmancɛ la.
[28] Faraon ka kɛlɛbolo ni wotorow ni sotigi minw donna kɔgɔji la Israɛl bɔnsɔn nɔ fɛ, ji seginna olu bɛɛ kan ka u bɛɛ tunun. Hali u kelenpe ma kisi.
[29] Nka Israɛl bɔnsɔn taamana gwele kan kɔgɔji cɛmancɛ la. Ji kɛra kogo ye u kinin ni u numan fɛ.
[30] Matigi ye Israɛl kisi ka bɔ Misirakaw bolo o don na. Israɛl ye Misirakaw suw ye kɔgɔji da la.
[31] Matigi ye koba min kɛ Misirakaw la, Israɛl y'o ye. Mɔgɔw siranna Matigi ɲɛ ka da ale ni a ka jɔnkɛ Musa la.