[1] «I kana nkalon kibaru lakali. I ni mɔgɔ jugu kana jɛ nkalon seereya la.
[2] «I kana tugu jama nɔ fɛ ka ko jugu kɛ. I kana i ka seereya jɛnge jama kosɔn ka kiri tiɲɛn.
[3] «I kana faantan fisaya mɔgɔ wɛrɛ ye a ka kiri ko la.
[4] «Ni i ye i jugu ka misi wala a ka fali tununnen ye, i ka o kɔsegin a ma.
[5] Ni i ye i jugu ka fali bilen ye a ka doni kɔrɔ, hali ni a ko man di i ye, i ka a dɛmɛ.
[6] «I kana i ka faantan ka kiri ko tiɲɛn.
[7] «I ka i mabɔ nkalon ko la. I kana mɔgɔ jalakibali wala mɔgɔ tilennen faga, k'a masɔrɔ ne tɛna jo di jalakitigi ma.
[8] I kana surɔ fɛn minɛ. Surɔ fɛn bɛ mɔgɔ kɛ i n'a fɔ fiyentɔ. A bɛ mɔgɔ tilennen ka kuma jɛngɛ.
[9] «I kana i fanga digi siginfɛ la. Aw bɛ siginfɛya cogo dɔn, k'a masɔrɔ aw tun ye siginfɛw ye Misira jamana la.
[10] «I ka dugukolo sɛnɛ ka a suman tigɛ san wɔɔrɔ kɔnɔ.
[11] A san wolonwulanan la i ka o dugukolo bila walisa a ka lafiya. I ka sɛgɛnbaatɔw na dumuni sɔrɔ a la. A tɔ min bɛ to olu kɔ, kungo sogow na o dun. I ka o ɲɔgɔn kɛ i ka rezɛn nakɔtu ni i ka olive nakɔtu la.
[12] «I ka baara kɛ tile wɔɔrɔ kɔnɔ ka i lafiya tile wolonwulanan la, walisa i ka misi ni i ka fali ni i ka jɔnmuso denkɛ ani i ka siginfɛ ka u lafiya.
[13] «Ne ye fɛn minw fɔ aw ye, a' ye aw yɛrɛw kɔlɔsi olu bɛɛ la. Aw kana bato fɛn wɛrɛ si tɔgɔ fɔ. Mɔgɔ si kana o tɔgɔ mɛn aw da la.
[14] «I ka seliba saba kɛ ne ye san o san.
[15] I ka buuru fununbali seli kɛ. I ka buuru fununbali dun tile wolonwula kɔnɔ, a waati latigɛlen na Abib kalo la, i ko ne y'a fɔ aw ye cogo min na, katuguni i bɔra Misira jamana la Abib kalo la. Mɔgɔ si bolo lankolon kana na ne ɲɛ kɔrɔ.
[16] I ye fɛn minw sɛnɛ i ka foro la, ni i bɛ olu suman kura kun fɔlɔ tigɛ tuma min na, i ka suman tigɛ seli kɛ. Ni i bɛ i ka foro la baara nafa lasagon tuma min na, san yɛlɛma tuma la, i ka suman lasagon seli kɛ.
[17] Aw ka cɛw bɛɛ ka na Matigi Ala ɲɛ kɔrɔ siɲɛ saba san o san.
[18] «I kana ne ka saraka joli ni buuru fununnen lase ɲɔgɔn fɛ. Ne ka saraka sogo kɛn kana si.
[19] «I ka na ni i ka suman kura kun fɔlɔ ye Matigi i ka Ala ka so kɔnɔ. «I kana baden tobi ni a ba nɔnɔ ye.
[20] «A filɛ, ne na mɛlɛkɛ ci i ɲɛ ka i mara sira la ka i ladon ne ka yɔrɔ labɛnnen na.
[21] I ka i yɛrɛ kɔlɔsi a ɲɛ kɔrɔ ka a kan minɛ. I kana a sɔsɔ, katuguni a tɛna i ka sariya tiɲɛn kow yafa, k'a masɔrɔ ne tɔgɔ b'a la.
[22] Nka ni i ye a kan minɛ, ne bɛ fɛn o fɛn fɔ i ye, ni i ye o bɛɛ kɛ, minw ye i juguw ye, ne na kɛ olu juguw ye, ka kɛ i kɛlɛɲɔgɔnw kɛlɛɲɔgɔn ye.
[23] Ne ka mɛlɛkɛ na taa i ɲɛ ka i ladon Amɔr siya ni Hɛti bɔnsɔn ni Ferɛs siya ani Kanankaw ni Hɛv siya ani Jebuskaw ka jamana la. Ne na olu bɛɛ si tunun.
[24] «I kana i biri u ka bato fɛnw kɔrɔ, i kana baara kɛ u ye. I kana u cogo ta, nka i ka u halaki ka u ban, ka u ka boli samasenw karikari.
[25] Aw ka baara kɛ Matigi aw ka Ala ye. Ni i ye o kɛ, a na duba aw ka dumuni ni aw ka ji ye. Ne na bana gɛn ka bɔ aw cɛma.
[26] Muso si kɔnɔ tɛna tiɲɛn i ka jamana la, muso si tɛna kɛ kɔna ye. Ne na i si tilew dafa.
[27] Ne na ne ɲɛsiranba bila ka taa i ɲɛ. I bɛ don siya minw cɛma, ne na a to o mɔgɔw bɛɛ ka boliboli i ɲɛ. Ne na a to i juguw ka u kɔ sin i ma.
[28] Ne na dondoliw ci i ɲɛ. U na Hɛv siya ni Kanankaw ani Hɛti bɔnsɔn gɛn ka bɔ i ɲɛ.
[29] Ne tɛna u gɛn ka bɔ i ɲɛ san kelen na, walisa jamana lankolon kana to. Wara kana caya i ma.
[30] Ne na u gɛn ka bɔ i kɔrɔ dɔɔnin dɔɔnin sani i ka jiidi ka se ka jamana minɛ.
[31] Ne na i dan yɔrɔ sigi ka bɔ Kɔgɔji Bilen na fo ka taa bila Filisiti jamana Kɔgɔji la, ka bɔ kungokolonba la fo ka taa se Ufrate ba da la. Ne na o jamana mɔgɔw don i bolo, i na u gɛn ka bɔ i ɲɛ.
[32] I kana layidu si ta u ye, wala u ka bato fɛnw ye.
[33] U kana sigi i ka jamana la. N'o kɛra, u na i bila ne hakɛ tali la. Ni i ye baara kɛ u ka bato fɛnw ye, o na kɛ minɛli jan ye, siga t'a la.»