[1] Musa ye Israɛl bɔnsɔn jama bɛɛ lajɛ ɲɔgɔn kan k'a fɔ u ye ko: «Matigi ye ci minw fɔ aw ye walisa aw ka u kɛ, olu filɛ ninw ye.
[2] Aw ka baara kɛ tile wɔɔrɔ kɔnɔ, nka tile wolonwulanan don ka kɛ don senuma ye aw fɛ, lafiɲɛ don senuma don Matigi ye. Ni mɔgɔ min ye baara kɛ o don na, o ka faga.
[3] Aw kana tasuma mana aw ka du si kɔnɔ lafiɲɛ don na.»
[4] Musa kumana Israɛl bɔnsɔn jama bɛɛ fɛ k'a fɔ ko Matigi ye nin ci fɔ ko:
[5] «Aw ka dɔ bɔ aw bolo fɛnw na ka Matigi sɔn. Mɔgɔ min bɛ o kɛ ni diyaɲe ye, olu ka na n'u ye ka a di Matigi ma, sanu ni warijɛ ni nsiranɛgɛ
[6] ani gese bulama ni lomaasa gese ani gese bilen ni lenfu gese ani ba si fana,
[7] sagajigi wolo minw donna gala bilen na, ani dofɛn wolow ni zajɛ jiri
[8] ani fitinɛ tulu ani suma diyalanw, u na kɛ munli tulu ni wusulan suma duman la,
[9] onikis kabakurunw ani kabakurun wɛrɛw ka kɛ efɔd ni disila fɛn kan.
[10] «Aw bɛɛ la mɔgɔ maɲɛrɛ dɔnnaw ka na, walisa Matigi ye fɛn minw ko fɔ, aw ka olu bɛɛ dila.
[11] So ni a kunna birifini ani a birilan ni a koloninw ani a jiri fɛrɛnw ni a bere janw ani a samasenw ni u jusigilanw,
[12] wagande ni a ta berew ni jurumu kafari yɔrɔ ni so cɛtigɛ fini,
[13] tabali ni a ta berew ni a minanw bɛɛ ani jirali buurukunw,
[14] fitinɛ, yeelen bɔli kama ani a minanw bɛɛ ni a bɛɛlɛw ni fitinɛ tulu,
[15] wusulan suma duman saraka bɔlan ni a ta berew ani munni tulu ni wusulan suma duman ani so datugu fini,
[16] saraka jenita saraka bɔlan ni a kɔnɔ da nsiranɛgɛ ni a ta berew ni a minanw bɛɛ ani koli minanba ni a sigilan,
[17] dukɛnɛ lamini finiw ni a samasenw ni u jusigilanw ani dukɛnɛ donda datugu fini,
[18] so bɔlɔ nun bɔlenw ani dukɛnɛ bɔlɔ nun bɔlenw ni u juruw,
[19] yɔrɔ senuma baarakɛ finiw, sarakalasebaa Aron ka fini senumaw ani a denkɛw ka finiw, sarakalasebaaya baara kama.»
[20] Israɛl bɔnsɔn jama bɛɛ taara ka bɔ Musa kɔrɔ.
[21] Mɔgɔ o mɔgɔ dusukun y'a sama, ani mɔgɔ o mɔgɔ y'a kɛ ni nganiya ɲuman ye, olu nana ni Matigi sɔn fɛnw ye, ɲɔgɔn kunbɛn finiso jɔli kama walisa a baara ka kɛ ani fini senumaw ka dila.
[22] Mɔgɔw bɛɛ, muso fara cɛ kan, minw y'a kɛ ni diyaɲe ye, olu nana ni nunna nɛgɛw ye, ani tulola nɛgɛw ni bolonkɔnila nɛgɛw ani bolokalala nɛgɛw, sanu fɛn sifaw bɛɛ. Mɔgɔw bɛɛ kelen-kelen nana ni u ka sanu nili fɛnw ye ka u di Matigi ma.
[23] Gese bulama ni lomaasa gese ani gese bilen ni lenfu gese ani ba si fana ni sagajigi wolow, minw donna gala bilen na, ani dofɛn wolow, o fɛn o fɛn tun bɛ mɔgɔ o mɔgɔ bolo, olu nana ni u ye.
[24] Mɔgɔ o mɔgɔ ye warijɛ ni nsiranɛgɛ kɛ nili fɛn ye, olu nana ka u di Matigi ma. Zajɛ jiri min bɛnna fɛn o fɛn ma, ni o tun bɛ mɔgɔ o mɔgɔ bolo, olu nana n'o ye.
[25] Muso maɲɛrɛ dɔnnaw bɛɛ ye paratali kɛ ka na ni u ka fɛn paratalenw ye, gese bulama ni lomaasa gese ni gese bilen ani lenfu gese.
[26] Muso hakilitigi minw dusukun ye u sama, olu ye ba si parata.
[27] Kuntigiw nana ni onikis kabakurun ani kabakurun dɔw ye, olu ka coron efɔd ni disila fɛn na.
[28] U nana ni suma diyalanw ni tulu ye fitinɛ ni munli tulu ani wusulan suma duman kama.
[29] Matigi ye baara min fɔ Musa ye, Israɛl bɔnsɔn nana ni diyaɲe nili fɛnw ye ka u di Matigi ma o kama. Mɔgɔ minw dusukun ye u sama, muso fara cɛ kan, olu nana.
[30] Musa y'a fɔ Israɛl bɔnsɔn ye ko: «A filɛ, Matigi ye Uri denkɛ Bezaleɛl ɲɛnatɔmɔ ka bɔ Juda bɔnsɔn na. Uri fa tun ye Hur ye.
[31] Matigi ye Bezaleɛl fa Ala Ni la ka hakilitigiya ni faamuli ni dɔnniya di a ma, walisa a ka baara sifaw bɛɛ cogo dɔn.
[32] A ye se di a ma ka maɲɛrɛ baara cogo kura dabɔ ka sanu ni warijɛ ni nsiranɛgɛ baara kɛ,
[33] ka kabakurun sɔngɔ gɛlɛnw dɛsɛ u coronni kama, ka jiri dɛsɛ ka maɲɛrɛ baara sifaw bɛɛ kɛ.
[34] A ye mɔgɔw kalanni dɔnniya di a ma. A ye o di Dan bɔnsɔn Ahisamak denkɛ Oholiab fana ma.
[35] A ye hakilitigiya di u ma, walisa u ka baara sifaw bɛɛ kɛ ka fɛn ɲɛgɛn ka maɲɛrɛ baara kɛ ka fini sɔgɔ ni gese bulama ni lomaasa gese ni gese bilen ani lenfu gese ye ka gese da fana ka baara sifaw bɛɛ kɛ ka maɲɛrɛ baara cogo kura dabɔ.