[1] «I ka nin sariyaw fɔ mɔgɔw ye:
[2] «Ni i ye Heburu jɔnkɛ dɔ san, a na baara kɛ san wɔɔrɔ kɔnɔ, nka a na hɔrɔnya a san wolonwulanan la ka bɔ gwansan.
[3] Ni a kelen donna, a kelen na bɔ. Ni a ni a muso donna, a ni a muso na bɔ.
[4] Ni a makɛ ye muso di a ma, ni o ye denkɛw wala denmusow bange a ye, o muso ni a denw na kɛ a makɛ taw ye, a kelen na bɔ.
[5] Ni o jɔnkɛ y'a fɔ k'a jɛya ko a bɛ a makɛ ni a muso ani a denw fɛ, ko a t'a fɛ ka hɔrɔnya,
[6] o tuma la a makɛ ka taa n'a ye Ala ɲɛ kɔrɔ. A ka a madon so da la kon na wala kondon jiri la, a makɛ ka a tulo sɔgɔ ni biɲɛ ye. O jɔnkɛ na to a makɛ ka jɔnya la a si bɛɛ la.
[7] «Ni cɛ ye a denmuso feere ka kɛ jɔnmuso ye, o tɛna hɔrɔnya jɔnkɛw hɔrɔnya cogo la.
[8] Ni o denmuso ko ma diya a makɛ ye, k'a sɔrɔ a tun y'a maminɛ, ko a na a furu, o tuma la a k'a to a ka kunmabɔ. A ma daga a ye k'a feere siya wɛrɛ mɔgɔ ma, katuguni a y'a janfa.
[9] Ni a tun y'a maminɛ a denkɛ ye, sariya min sigira denmusow ko la, a ka a ɲɛnabɔ ka kɛɲɛ ni o ye.
[10] Ni a ye muso wɛrɛ furu, a kana dɔ bɔ muso fɔlɔ ka balo ni a fɛɛrɛbɔ ni a si yɔrɔ ko la.
[11] Ni a ma nin ko saba kɛ o ye, o na hɔrɔnya ka bɔ gwansan, a tɛna wari sara.
[12] «Ni mɔgɔ min ye mɔgɔ gosi k'a faga, o tigi fana ka faga.
[13] Ni mɔgɔ dɔ ma i merun ka dɔ makɔnɔ k'a faga, nka a kɛra kasaara kosɔn, ne na yɛrɛ kun dɔgɔ yɔrɔ dila, a ka boli ka taa a kun dogo yen.
[14] Nka ni mɔgɔ y'i tugu k'a mɔgɔɲɔgɔn faga ni keguya ye, i ka o mɔgɔ fagala minɛ ka bɔ ne ka saraka bɔlan yɛrɛ la k'a faga.
[15] «Ni mɔgɔ min ye a fa wala a ba gosi, o tigi ka faga.
[16] «Ni mɔgɔ min ye mɔgɔ dɔ sonya ka o feere, ani mɔgɔ sonyalen yera min bolo, o tigi ka faga.
[17] «Ni mɔgɔ min ye a fa wala a ba neni, o tigi ka faga.
[18] «Ni mɔgɔ dɔw kɛlɛla, ni kelen ye dɔ gosi ni kabakurun wala ni a bolokurun ye k'a jogin nka a ma sa, a banana ka da,
[19] ni a bɔra ka yaala ni bere ye, a gosibaa na hɔrɔnya. O bɛɛ n'a ta a ka o bana waati sara, fo ka a kɛnɛya kosɛbɛ.
[20] «Ni mɔgɔ min ye a ka jɔnkɛ wala a ka jɔnmuso gosi ni bere ye, fo ka o sa a bolo, o makɛ na ɲangi.
[21] Nka ni a ɲɛnama ye tile kelen wala tile fila kɛ, a makɛ tɛna ɲangi, sabu a ka wari tun don.
[22] «Ni cɛ dɔw kɛlɛtɔ ye muso kɔnɔma dɔ ɲɔni ka a kɔnɔ tiɲɛn, ni fɛn wɛrɛ ma kɛ o muso la, a cɛ bɛ ɲangili wari min fɔ, u ka o sara ka kɛɲɛ ni kiritigɛlaw ka kuma fɔlen ye.
[23] Nka ni fɛn wɛrɛ kɛra o muso la, i ka ni kɛ ni sara ye.
[24] Ɲɛ ka kɛɲɛ sara ye. Ɲin ka kɛɲin sara ye. Bolo ka kɛ bolo sara ye. Sen ka kɛ sen sara ye.
[25] Jenini ka kɛ jenini sara ye. Joli ka kɛ joli sara ye. Joginni ka kɛ joginni sara ye.
[26] «Ni cɛ min ye a ka jɔnkɛ wala a ka jɔnmuso gosi a ɲɛ la ka a ɲɛ kelen ci, a ka o hɔrɔnya a ɲɛ kosɔn.
[27] Ni a ye a ka jɔnkɛ wala a ka jɔnmuso gosi ka a ɲin kari, a ka o hɔrɔnya a ɲin kosɔn.
[28] «Ni misi ye cɛ wala muso tuu fo ka a faga, o misi ka bon ni kabakurunw ye k'a faga. A sogo kana dun, nka misitigi na hɔrɔnya.
[29] Nka ni misi delila ka mɔgɔ tuu, ni o fɔra a tigi ye, ni a ma sɔn ka o misi siri, ni o misi ye cɛ wala muso faga, o misi ka bon ni kabakurunw ye k'a faga, misitigi fana ka faga.
[30] Ni kunmabɔ sara bilara a kan, a ka o wari fɔlen di ka a yɛrɛ kunmabɔ.
[31] Ni o misi ye denkɛ wala denmuso tuu, nin sariya kelen bɛ u bɛɛ kan.
[32] Ni o misi ye jɔnkɛ wala jɔnmuso tuu, a tigi ka warijɛ sikle bisaba di a makɛ ma. Misi fana ka bon ni kabakurunw ye k'a faga.
[33] «Ni mɔgɔ min ye dingɛ dayɛlɛ, wala ni min ye dingɛ sen ka a da yɛlɛlen to, ni misi wala fali bira o kɔnɔ,
[34] o dingɛtigi ka o sara. A ka wari di bagantigi ma, bagan su na kɛ a yɛrɛ ta ye.
[35] «Ni mɔgɔ min ka misi ye mɔgɔ wɛrɛ ka misi tuu fo ka a faga, u ka misi ɲɛnama feere ka o sɔngɔ tila u cɛ. U ka misi su fana tila u cɛ.
[36] Ni a dɔnna ko misi delila ka tuuli kɛ ka kɔrɔ, ni a tigi ma a siri, a na misi sara misi la. Misi su na kɛ a yɛrɛ ta ye.