[1] «I ka saraka bɔlan dila ni zajɛ jiri ye. A janya ka kɛ nɔnkɔn ɲɛ duuru ye. A bonya ka kɛ nɔnkɔn ɲɛ duuru ye. A fan naani ka kɛɲɛ. A jɔ kundama ka kɛ nɔnkɔn ɲɛ saba ye.
[2] I ka biɲɛkolow dila saraka bɔlan seleke naani la. I ka nsiranɛgɛ da a yɔrɔ bɛɛ kan.
[3] I ka a minanw bɛɛ dila, a bugurijɛ kɛlanw ni a bugurijɛ cɛlanw ni a tasaw ani a sogo sɔgɔlanw ani a tasuma bɔlanw. I ka o minanw bɛɛ dila ni nsiranɛgɛ ye.
[4] I ka saraka bɔlan kɔnɔna da nɛgɛ dila ni nsiranɛgɛ ye, i ko basi tɛmɛ ka nsiranɛgɛ nkɔriw kɛ a seleke naani la.
[5] I ka o da saraka bɔlan dawolo jukɔrɔ, a cɛmancɛ la ka bɔ duguma.
[6] I ka berew dila ni zajɛ jiri ye ka nsiranɛgɛ da u yɔrɔ bɛɛ kan saraka bɔlan tali kama.
[7] Berew ka don nsiranɛgɛ nkɔriw la saraka bɔlan fan fila la a ta tuma la.
[8] I ka a dila ni jiri fɛrɛnw ye ka a kɔnɔna lankolon to. Cogo min jirala i la ka i to kulu kan, u ka a dila ka kɛɲɛ ni o ye.
[9] «I ka so dukɛnɛ dila. A worodugu yanfan lamini finiw ka dila ni lenfu fini ye. A janya ka kɛ nɔnkɔn ɲɛ kɛmɛ ye a fan kelen na.
[10] A samasenw ka kɛ mugan ye, u nsiranɛgɛ jusigilanw ka kɛ mugan ye. Samasenw nɛgɛ ntolow ni u fini dulon berew ka dila ni warijɛ ye.
[11] A saheli yanfan ka dila o cogo la. Lamini finiw janya ka kɛ nɔnkɔn ɲɛ kɛmɛ ye. A lamini samasenw ni u nsiranɛgɛ jusigilanw ka kɛ mugan ye. Samasenw nɛgɛ ntolow ni u fini dulon berew ka dila ni warijɛ ye.
[12] Dukɛnɛ tilebi yanfan lamini fini janya ka kɛ nɔnkɔn ɲɛ biduuru ye, a samasenw ka kɛ tan ye, ani u jusigilan tan.
[13] Dukɛnɛ kɔrɔn yanfan fɛ la ka kɛ nɔnkɔn ɲɛ biduuru ye.
[14] Lamini fini minw bɛ a donda fan kelen fɛ, olu janya ka kɛ nɔnkɔn ɲɛ tan ni duuru ye, u samasenw ka kɛ saba ye, ani u jusigilan saba.
[15] A donda fan dɔ finiw janya ka kɛ nɔnkɔn ɲɛ tan ni duuru ye, u samasenw ka kɛ saba ye, ani u jusigilan saba.
[16] Dukɛnɛ donda la fini ka kɛ nonkɔn ɲɛ mugan ye. A ka dila ni gese bulama ni lomaasa gese ni gese bilen ani lenfu gese ye ka a sɔgɔ. U samasenw ka kɛ naani ye, ani u jusigilan naani.
[17] Dukɛnɛ lamini samasenw fini dulon bere ni u tulomaw ka dila ni warijɛ ye. U jusigilanw ka dila ni nsiranɛgɛ ye.
[18] Dukɛnɛ janya ka kɛ nɔnkɔn ɲɛ kɛmɛ ye, a bonya ka kɛ nɔnkɔn ɲɛ biduuru ye. A jɔ kundama ka kɛ nɔnkɔn ɲɛ duuru ye. A lamini finiw ka dila ni lenfu fini ye. U jusigilanw ka dila ni nsiranɛgɛ ye.
[19] So baara kɛ minanw bɛɛ ani a bɔlɔ nun bɔlenw bɛɛ ni dukɛnɛ bɔlɔ nun bɔlenw bɛɛ ka dila ni nsiranɛgɛ ye.
[20] «I k'a fɔ Israɛl bɔnsɔn ye, ko u ka na ni olive mɔ susulen tulu yɛrɛwolo ye fitinɛ kama, walisa a manalen ka to tuma bɛɛ.
[21] Aron ni a denkɛw ka fitinɛ labɛn, walisa a manalen ka to Matigi ɲɛ kɔrɔ kabini wula fɛ fo ka taa dugu jɛ, ɲɔgɔn kunbɛn finiso kɔnɔ so cɛtigɛ finiɲɛ fɛ, o bɛ seereyaɲɛ fɛ. O ka kɛ sariya ye Israɛl bɔnsɔn fɛ u bɔnsɔn nataw bɛɛ la badaa.