[1] O tuma la Musa ni Israɛl bɔnsɔn ye nin dɔnkili da Matigi ye ko: «Ne na dɔnkili da ka Matigi bonya, k'a masɔrɔ a ye a ka sebaaya jira. A ye so ni sotigi fili kɔgɔji la.
[2] «Matigi ye ne barika ni ne ka tanuli sababu ye. Ala ye ne kisi. Ne ka Ala don, ne na a tanu, ne fa ka Ala don, ne na a bonya.
[3] «Matigi ye kɛlɛ kuntigi ye, a tɔgɔ ye Matigi ye.
[4] «A ye Faraon ka wotoro ni a ka kɛlɛbolo fili kɔgɔji la. O kɛlɛkɛcɛ ɲɛnatɔmɔlenw tununna Kɔgɔji Bilen na.
[5] «Ji kuruw ye u tunun, u jiginna ji dun na i ko kabakurun.
[6] «E Matigi, i kininbolo ye i ka sebaaya jira. E Matigi, i kininbolo ye an jugu mɔrɔnko.
[7] «Mɔgɔ minw wulila i kama, i ye olu bɛɛ labi i ka sebaaya barika la. I ye i ka dimiya manatɔ labila. A ye u jeni i ko bin mugumugu.
[8] «I dafiɲɛ ye ji lajɛ ɲɔgɔn kan. Ji woyo y'a jɔ i ko kogo. Ji dunba simina kɔgɔji cɛmancɛ la.
[9] «I jugu ko: ‹Ne na u nɔgɛn, ne na kun u la. Ne na u bolo fɛnw cɛ ka olu tilatila. Ne mɔnɛ na bɔ ka ne wasa. Ne na ne ka npan sama, ne bolo na u halaki.›
[10] «I ye i dafiɲɛ fyɛ, kɔgɔji ye u tunun. U jiginna ji dunba jukɔrɔ i ko plɔn.
[11] «E Matigi, i bɔɲɔgɔnko jumɛn bɛ bato fɛnw cɛma? Jɔn ye i bɔɲɔgɔnko ye? I masirilen bɛ ni senuya ye. I ka kan ni tanuli ye. I bɛ kabakow kɛ.
[12] «I ye i kininbolo mɔɔnɔbɔ, dugukolo ye u kunun.
[13] «I ye i ka mɔgɔ kunmabɔlenw labɔ yen i ka makari kosɔn. I ye u ɲɛ minɛ ka taa i ka yɔrɔ senuma la, ka i ka sebaaya to u fɛ.
[14] «Siyaw ye o kibaru mɛn, u bɛ yɛrɛyɛrɛ. Siranba ye Filisitikaw minɛ.
[15] «Edɔm jamana kuntigiw ja tigɛra. Moab kuntigiw bɛ yɛrɛyɛrɛ. Kanankaw bɛɛ barika banna.
[16] «Siran ni jatigɛ cunna u kan. I bolo barika y'a to u da ka minɛ u la. U kɛra i ko kabakurun fo i ka mɔgɔw ka tɛmɛn, Matigi, fo i ka mɔgɔ kunmabɔlenw bɛɛ ka tɛmɛn.
[17] «I bɛ na ni olu ye ka u sigi i ka kulu kan, i ka ciyɛn kɔni. Matigi, i ye sigi yɔrɔ min dila i yɛrɛ ye, Matigi, i bolo ye yɔrɔ senuma min dila, i na sigi yen.
[18] «Matigi na sigi masaya la badaa badaa.»
[19] Faraon ka sow ni a ka wotorow ani a ka sotigiw bɛɛ donna kɔgɔji la. Matigi ye ji lasegin u kan, nka Israɛl bɔnsɔn taamana gwele kan kɔgɔji cɛmancɛ la.
[20] Kira musoma Mariyama, Aron kɔrɔmuso, o ye ntama ta a bolo. Muso ntamatigiw bɛɛ bɔra ka taa a nɔ fɛ ka dɔn kɛ.
[21] Israɛl bɔnsɔn ye Mariyama da laminɛ, a ko: «Aw ka dɔnkili da Matigi ye, katuguni a ye a ka sebaaya jira. A ye so ni sotigi fili kɔgɔji la.»
[22] Musa ye Israɛl ɲɛ minɛ ka bɔ Kɔgɔji Bilen yɔrɔ la ka taa Sur kungokolon kɔnɔ. U ye tile saba taama kɛ kungokolon kɔnɔ, u ma ji si sɔrɔ.
[23] U selen Mara, u ma se ka Mara ji min a kunaya kosɔn. O de y'a to o yɔrɔ tɔgɔ ko Mara.
[24] Mɔgɔw ye dajukɔrɔ kuma fɔ Musa ma ko: «An na mun min?»
[25] Musa kasira Matigi nɔ fɛ. Matigi ye jiri sun jira a la. A ye o fili ji la, ji diyara. Matigi ye sariya sigi ka o ci fɔlenw fɔ u ye yen. A ye u kɔrɔbɔ yen fana.
[26] A ko: «Ni i bɛ i tulo majɔ Matigi, i ka Ala kan na ka ko tilennen kɛ a ɲɛ kɔrɔ, ka i tulo majɔ a ka ci fɔlenw la ka a ka sariyaw bɛɛ mara, ne ye bana minw kɛ Misirakaw la, ne tɛna o si kɛ i la, katuguni ne ye Matigi, i kɛnɛyabaa de ye.»
[27] O kɔ, u sera Elim. Ji boyi tan ni fila ani ntamaro sun biwolonwula tun bɛ yen. U ye buguw turu ji da la yen.